مادەنيەت جانە سپورت ۆيتسە-ءمينيسترى نۇرعيسا داۋەشوۆ كينەماتوگرافيستەر مەن ۇلتتىق كينونى مەملەكەتتىك قولداۋ ورتالىعى اراسىنداعى داۋعا پىكىر ءبىلدىردى. بۇل تۋرالى ۆيتسە-مينيستر Facebook پاراقشاسىندا جازدى، دەپ حابارلايدى “ادىرنا” ۇلتتىق پورتالى.
«قازىرگى ۋاقىتتا مەملەكەت قارجىسىن الۋعا ۇمىتكەر كينوجوبالاردىڭ كەزەكتى – بەسىنشى كونكۋرسى ءوتىپ جاتىر. ونىڭ ۇيىمداستىرۋشىسى - ۇلتتىق كينونى مەملەكەتتىك قولداۋ ورتالىعى. بيىل ەلەكتروندى جانە قاعاز فورماتىندا 290 ءوتىنىم كەلىپ ءتۇستى. كەي كينەماتوگرافيستەر كينو ورتالىعى (ۇكقمو) وتكىزگەن كونكۋرستىڭ ناتيجەسىمەن كەلىسپەيدى. حالىق ۇنىنە قۇلاق اساتىن مەملەكەت قاعيداتىن باسشىلىققا الا وتىرىپ جانە كەلىپ تۇسكەن وتىنىشتەردى ەسكەرىپ، ءمينيستردىڭ تاپسىرماسى بويىنشا كەلىپ تۇسكەن بارلىق وتىنىمدەردى قايتا قارايتىن تاۋەلسىز كوميسسيا قۇرىلادى»،-دەپ جازدى نۇرعيسا داۋەشوۆ Facebook پاراقشاسىندا.
ونىڭ ايتۋىنشا، بۇل وبەكتيۆتىلىكتى قامتاماسىز ەتۋ ءۇشىن جاسالىپ وتىر.
«سونىمەن قاتار، وتاندىق فيلمدەردى قارجىلاندىرۋ تۋرالى ايتىپ وتىرعانىمىزدى جانە ساپالى فيلمدەردى شىعارۋ مەن قارجىلاندىرۋ باستى نازاردا بولاتىنىن ءتۇسىنۋىمىز ماڭىزدى»،- دەيدى ول
ترانسپارەنتتىلىكتى قامتاماسىز ەتۋ ءۇشىن قاجەتتى جۇمىستىڭ ءبارى جاسالادى. پيتچينگ كوميسسيا جۇمىسى اياقتالعاننان كەيىن وتكىزىلەدى.
ايتا كەتەيىك، مامىردىڭ 12-ءسى كۇنى الماتىدا مەملەكەتتىك كينەماتوگرافيا ورتالىعىنىڭ بايقاۋىنا فيلمدەر ىرىكتەۋىنىڭ ادىلەتسىز ناتيجەسىنە قارسى رەجيسسەرلەردىڭ ميتينگى ءوتتى. ولار بايقاۋداعى فيلمدەردىڭ الدىن الا ىرىكتەۋ ناتيجەلەرىن جويۋدى، مادەنيەت مينيسترىمەن كەزدەسۋ ۇيىمداستىرۋدى، سونداي-اق كينو سۇيەمەلدەۋ ورتالىعىنىڭ باسشىلىعىن جۇمىستان بوساتۋدى جانە وعان قاتىستى تەرگەۋدى باستاۋدى تالاپ ەتتى.
