14 قىركۇيەك كۇنى تۇركيا استاناسى انكارادا رەسپۋبليكالىق حالىق پارتياسىنىڭ (رحپ) ونداعان مىڭ قولداۋشىسى نارازىلىق شەرۋىنە شىقتى، دەپ حابارلايدى "ادىرنا" ۇلتتىق پورتالى.
Reuters اگەنتتىگىنىڭ حابارلاۋىنشا، اكتسياعا قاتىسۋشىلار پرەزيدەنت رەجەپ تايىپ ەردوعاننىڭ وتستاۆكاسىن تالاپ ەتكەن ۇراندار كوتەرگەن.
نارازىلىق 15 قىركۇيەكتە وتەتىن سوت پروتسەسىنىڭ الدىندا ۇيىمداستىرىلدى.
سوتتا 2023 جىلدىڭ قاراشاسىندا وتكەن رحپ سەزىنىڭ ناتيجەلەرىن جويۋ ماسەلەسى قارالادى. سول جيىندا پارتيا توراعاسى بولىپ وزگۇر وزەل سايلانعان ەدى.
ەگەر سوت سەزد قورىتىندىسىن جارامسىز دەپ تاپسا، وزەل قىزمەتىنەن كەتۋگە ءماجبۇر بولادى. بۇل جاعداي 2028 جىلعى پرەزيدەنتتىك سايلاۋدىڭ مەرزىمىنە ىقپال ەتىپ، ەلدەگى باستى وپپوزيتسيالىق پارتيا ىشىندە وزگەرىستەرگە اكەلۋى مۇمكىن.
ميتينگ بارىسىندا ءسوز سويلەگەن وزگۇر وزەل ايىپتاۋلاردى «جالا» دەپ اتاپ، ءىستىڭ ساياسي استارى بارىن ايتتى.
«بۇل – بولاشاق پرەزيدەنتكە، بولاشاق ۇكىمەتكە قارسى باعىتتالعان توڭكەرىس. ءبىز وعان قارسىلاسامىز»، – دەدى ول.
