Mádenıet jáne sport vıe-mınıstri Nurǵısa Dáýeshov kınematografıster men Ulttyq kınony memlekettik qoldaý ortalyǵy arasyndaǵy daýǵa pikir bildirdi. Bul týraly vıe-mınıstr Facebook paraqshasynda jazdy, dep habarlaıdy “Adyrna” ulttyq portaly.
«Qazirgi ýaqytta memleket qarjysyn alýǵa úmitker kınojobalardyń kezekti – besinshi konkýrsy ótip jatyr. Onyń uıymdastyrýshysy - Ulttyq kınony memlekettik qoldaý ortalyǵy. Bıyl elektrondy jáne qaǵaz formatynda 290 ótinim kelip tústi. Keı kınematografıster kıno ortalyǵy (UKQMO) ótkizgen konkýrstyń nátıjesimen kelispeıdi. Halyq únine qulaq asatyn memleket qaǵıdatyn basshylyqqa ala otyryp jáne kelip túsken ótinishterdi eskerip, mınıstrdiń tapsyrmasy boıynsha kelip túsken barlyq ótinimderdi qaıta qaraıtyn táýelsiz komıssııa qurylady»,-dep jazdy Nurǵısa Dáýeshov Facebook paraqshasynda.
Onyń aıtýynsha, bul obektıvtilikti qamtamasyz etý úshin jasalyp otyr.
«Sonymen qatar, otandyq fılmderdi qarjylandyrý týraly aıtyp otyrǵanymyzdy jáne sapaly fılmderdi shyǵarý men qarjylandyrý basty nazarda bolatynyn túsinýimiz mańyzdy»,- deıdi ol
Transparenttilikti qamtamasyz etý úshin qajetti jumystyń bári jasalady. Pıtchıng komıssııa jumysy aıaqtalǵannan keıin ótkiziledi.
Aıta keteıik, mamyrdyń 12-si kúni Almatyda Memlekettik kınematografııa ortalyǵynyń baıqaýyna fılmder irikteýiniń ádiletsiz nátıjesine qarsy rejısserlerdiń mıtıngi ótti. Olar baıqaýdaǵy fılmderdiń aldyn ala irikteý nátıjelerin joıýdy, Mádenıet mınıstrimen kezdesý uıymdastyrýdy, sondaı-aq kıno súıemeldeý ortalyǵynyń basshylyǵyn jumystan bosatýdy jáne oǵan qatysty tergeýdi bastaýdy talap etti.
