قىرعىز ساياساتكەرلەرى ەكس-پرەزيدەنت المازبەك اتامباەۆتى سوتقا بەرمەك.
كوكتەمنىڭ كەلۋىمەن قىرعىزستان ساياساتى دا جاندانا باستادى. اتامباەۆ بيلىگى كەزىندە تۇرمەگە جابىلعان ەكس-ۆيتسە-پرەمەر بەكبولوت تالعارباكوۆ باستاعان بىرقاتار ساياساتكەرلەردىڭ بوستاندىققا شىعۋىمەن بىشكەك ماڭىنداعى تارتىس جاڭا دەڭگەيگە كوتەرىلدى. تالعاربەكوۆ ناۋرىز ايىنىڭ 7-ءى كۇنى بوستاندىققا شىعا سالىسىمەن جۋرناليستەر سۇراعىنا جاۋاپ بەردى. وندا ول اتامباەۆتى سوتقا بەرەتىندىگىن ايتتى.
«ول (اتامباەۆ –رەد) ماعان جالا جاۋىپ، ار-نامىسىمدى تاپتاعانى ءۇشىن جاۋاپ بەرۋى ءتيىس. مەنى شەتەلدىك اسكەريلەرمەن بايلانىس ورناتتى دەپ ايىپتادى. بىراق بۇنىسىن دالەلدەي المادى» - دەپ مالىمدەدى تالعاربەكوۆ.
ساراپشىلار پىكىرىنشە، تۇرمەدەن امنيستيامەن شىعىپ جاتقان وپپوششيتسيالىق ساياساتكەرلەردىڭ بارلىعى اتامباەۆتى سوتقا بەرۋ ارقىلى ونى 2020 جىلى وتەتىن پارلامەنت سايلاۋىنا قاتىستىرماۋدىڭ العىشارتتارىن جاساۋدا. سەبەبى ولاردىڭ بار ماقساتى ونسىزدا ەكىگە بولىنگەن ءبىر كەزدەرى اتامباەۆ بيلىگىنىڭ قوزعاۋشى كۇشى بولعان «قىرعىزستان سوتسيال-دەموكراتيالىق پارتياسىن» ءبىرجولاتا قۇلاتۋ.
ساياساتتانۋشى مارس ساريەۆتىڭ ايتۋىنشا، قسدپ-نىڭ ەكىگە بولىنۋىنەن كەيىن پارتيا مۇشەلەرىنىڭ باسىم كوپشىلىگى سوورونباي جەەنبەكوۆ بيلىگىنە جاقىن ەكىنشى بلوكتىڭ كوشباسشىسى يسا ومۋركۋلوۆتىڭ جاعىنا ءوتىپ كەتكەن. ولار پارتيا قۇرىلتايىن ءساۋىر ايىنىڭ 3-ءى كۇنىنە بەلگىلەپ، وسى ارقىلى اتامباەۆتى پارتيا قۇراماعىنان شىعارىپ تاستاۋدىڭ جولىن قاراستىرۋدا.
بۇعان دەيىن اتامباەۆ ءوزىنىڭ 2020 جىلى وتەتىن پارلامەنت سايلاۋىنا قاتىساتىندىعىن ايتقان. ول قسدپ قۇرىلتايىن ءساۋىر ايىنىڭ 6-ىنا بەلگىلەگەن.
بىراق، ازىرگە قىرعىزستاندا جەەنبەكوۆتان وزگە اتامباەۆقا قارسى كەلەتىن بىردە-ءبىر ساياسي كۇش جوق. سەبەبى جوعارىدا اتالعان ساياساتكەرلەردىڭ بارلىعىندا اتامباەۆقا تەڭ كەلەتىن ادامي، قارجىلاي جانە مەديالىق رەسۋرستارى جوق. دەسە دە، وپپوزيتسيا وكىلدەرى جەەنبەكوۆپەن ءبىر ماملەگە كەلىپ، بىرىگىپ كەتەتىن بولسا، ساياساتقا قايتىپ كەلۋدى ويلاستىرىپ جۇرگەن اتامباەۆقا وڭاي بولماسى انىق. بىراق، ەگەر الداعى ءبىر جىلدا وقيعا ءدال وسى ستسەناري بويىنشا ءوربيتىن بولسا، وندا اتامباەۆ «زيالى قاۋىم» وپەراتسياسىن ىسكە قوسۋى مۇمكىن. سەبەبى جەەنبەكوۆ بيلىك باسىنا كەلگەلى بەرى قىرعىزستاندا يسلامدانۋ باعىتى كۇشەيگەن. ال بۇل ءوز كەزەگىندە زيالى قاۋىم وكىلدەرىنە ۇنامايدى. ونىڭ ۇستىنە اتامباەۆ وسىدان ءبىراز ۋاقىت بۇرىن قىرعىز ەليتاسىن «جەەنبەكوۆتىڭ بيلىك باسىنا كەلۋىمەن يسلام ىقپالى كۇشەيۋى مۇمكىن» ەكەندىگىن ايتىپ ەسكەرتكەن.
ەسداۋلەت قىزىربەكۇلى
"The Qazaq Times"
https://qazaqtimes.com/article/58407
