قاسىم-جومارت توقاەۆ پەن سي تسزينپين كەلىسسوز جۇرگىزدى، دەپ حابارلايدى «ادىرنا» ءتىلشىسى.
«قازاقستان ءۇشىن قىتاي حالىق رەسپۋبليكاسىنىڭ ورنى – ەرەكشە. ءبىزدىڭ ىنتىماقتاستىعىمىز مىزعىماس دوستىققا جانە ءوزارا قولداۋعا نەگىزدەلگەن. ەكىجاقتى قارىم-قاتىناستى جانداندىرۋ جولىنداعى ماقساتىمىز – ورتاق. ايماقتىق جانە حالىقارالىق قاۋىپسىزدىكتى، ءوزارا ىقپالداستىقتى نىعايتۋدى كوزدەيتىن مۇراتىمىز دا – ءبىر. ءبىز ءۇشىن قىتايمەن ماڭگىلىك ءارى جان-جاقتى ستراتەگيالىق ارىپتەستىكتى ودان ءارى دامىتۋ وتە ماڭىزدى»، – دەدى ول.
پرەزيدەنتتىڭ ايتۋىنشا، قىتاي — قازاقستاننىڭ نەگىزگى ساۋدا سەرىكتەستەرىنىڭ ءبىرى.
«وتكەن جىلدىڭ قورىتىندىسى بويىنشا ءوزارا ساۋدا-ساتتىق كولەمى 30 جىلدىڭ ىشىندەگى رەكوردتىق دەڭگەيگە جەتىپ، 31 ملرد دوللاردان استى. مۇنداي قارقىنمەن ءبىز جاقىن ارادا تاۋار اينالىمى كورسەتكىشىن 35 ملرد دوللارعا دەيىن جەتكىزۋ ماقساتىنا قول جەتكىزە الامىز دەپ ويلايمىن. سوندىقتان 2030 جىلعا قاراي 40 ملرد دوللارلىق مەجەنى بەلگىلەۋدى ۇسىنامىن. وسى ماقساتقا جەتۋ ءۇشىن ءبىز ءوزارا ساۋدا نومەنكلاتۋراسىن كەڭەيتە الار ەدىك»،—دەپ پىكىر ءبىلدىردى توقاەۆ.
قحر توراعاسى سي تسزينپين قاسىم-جومارت كەمەلۇلىنا قوناقجايلىق ءىلتيپات ءبىلدىرىپ، 70 جاستىق مەرەيتويىمەن قۇتتىقتادى.
«وسىنداي ايتۋلى كۇنى ءسىز قىتايعا مەملەكەتتىك ساپارمەن كەلىپ وتىرسىز. بۇل ءبىزدىڭ ەكىجاقتى ىنتىماقتاستىعىمىزدىڭ جوعارى دەڭگەيدە ەكەنىن كورسەتەدى جانە قىتايمەن تىعىز بايلانىستارىڭىزدى تاعى دا راستايدى. قىتاي مەن قازاقستان قىتاي-قازاق قاتىناستارىنىڭ جاڭا «التىن 30 جىلدىعىنا» قادام باستى. ءبىزدىڭ ەلدەرىمىز دوستىق، ءوزارا قولداۋ ءداستۇرىن دامىتىپ، ءتيىمدى ىنتىماقتاستىقتى تەرەڭدەتۋى قاجەت»، – دەدى قحر توراعاسى.
كەزدەسۋ بارىسىندا تاراپتار ەكى ەلدىڭ ساۋدا-ەكونوميكا، مۇناي-گاز، مۇناي حيمياسى، ەنەرگەتيكا، ءبىلىم جانە عىلىم، قارجى سالالارىنداعى جان-جاقتى ىنتىماقتاستىعىن دامىتۋ، كولىك-ترانزيت الەۋەتىن ارتتىرۋ ماسەلەلەرىن تالقىلادى. سونداي-اق ولار حالىقارالىق جانە وڭىرلىك كۇن تارتىبىندەگى ماسەلەلەر جونىندە پىكىر الماستى.
