"اتاجۇرت ەرىكتىلەرى" ۇيىمىنىڭ جەتەكشىسى سەرىكجان ءبىلاشتى پوليتسيا قىزمەتكەرلەرى ناۋرىزدىڭ توعىزىنان ونىنا قاراعان كۇنى الماتىداعى قوناق ۇيدەن تۇنگى ەكى جارىم شاماسىندا ۇستاپ الىپ كەتكەن. "قازىر ول استانا قالالىق پوليتسيا دەپارتامەنتىندە وتىر" دەپ حابارلادى قوعامدىق ۇيىم وكىلى قايرات بايتوللا ازاتتىق تىلشىسىنە 10 ناۋرىزدا تۇستە.
ونىڭ ايتۋىنشا، سەنبى، 9 ناۋرىزدا "سەرىكجان ءبىلاشتى بەلگىسىز بىرەۋلەردىڭ اڭدىعانى بەلگىلى بولعاننان كەيىن" ارىپتەستەرى قاۋىپسىزدىك ماقساتىندا ۇيىنە ەمەس، قوناق ۇيگە بارۋعا كوندىرگەن. ءتۇن جارىمدا ەسىكتى تەۋىپ اشىپ كىرگەن 10-15 ادامنىڭ اراسىندا فورما كيگەندەرى دە، قاراپايىم كيىممەن جۇرگەندەرى دە بولعان. ولار سەرىكجان ءبىلاشتى ۇستاپ، ۇشاقپەن دەرەۋ استاناعا جەتكىزگەن.
"تاڭەرتەڭ سەرىكجاننىڭ ءوزى بىزگە حابارلاستى. ازەربايجان، تاتار مادەني بىرلەستىكتەرىنىڭ جيىنىندا سويلەگەن ءسوزىن بىرەۋلەر بۇرمالاپ، پوليتسياعا ارىزدانعان ەكەن. سول ارىز نەگىزىندە ۇستاعان. بۇل پروكۋراتۋرا سانكتسياسىمەن سوتقا جىبەرىلگەن دۇنيە ەمەس ەكەن. باسا-كوكتەپ كىرىپ، حالىقتى قورقىتىپ ۇركىتۋگە بولا ما؟" دەيدى قايرات بايتوللا ازاتتىق تىلشىسىنە.
استانا قالالىق پوليتسيا دەپارتامەنتى "اتاجۇرت ەرىكتىلەرى" ۇيىمىنىڭ جەتەكشىسى سەرىكجان ءبىلاشتىڭ ۇستالعانىن راستادى.
"10 ناۋرىزدا استانا قالالىق پوليتسيا دەپارتامەنتى قىزمەتكەرلەرى الەۋمەتتىك جانە ۇلتتىق ارانداتۋعا باعىتتالعان ءىس-ارەكەتتەرگە باردى دەگەن كۇدىكپەن سەرىكجان ءبىلاشتى ۇستادى. تەرگەۋ امالدارى ءجۇرىپ جاتىر. تەرگەۋ مۇددەسىنە وراي باسقا جايتتار جاريا ەتىلمەيدى" دەلىنگەن پوليتسيا مالىمدەمەسىندە.
"اتاجۇرت ەرىكتىلەرى" ۇيىمى Facebوok-تاعى پاراقشاسىندا ۇيىمنىڭ كەڭسەسىن 10 ناۋرىزدا پوليتسيا قىزمەتكەرلەرى تەكسەرگەنىن دە حابارلادى.
ناۋرىزدىڭ 10-ى كۇنى تۇستەن كەيىن "اتاجۇرت ەرىكتىلەرى" ۇيىمى Facebook-تاعى پاراقشاسىندا سەرىكجان ءبىلاشتىڭ ۆيدەومالىمدەمەسىن تاراتتى. وندا ۇيىم جەتەكشىسى ءوزىنىڭ استانا قالالىق پوليتسيا دەپارتامەنتىندە وتىرعانىن، وزىنەن بايماعامبەتوۆ ەسىمدى تەرگەۋشى سۇراق-جاۋاپ الىپ جاتقانىن ايتتى.
"ماعان "ۇلتارالىق ارازدىق تۋدىردى" دەگەن باپ بويىنشا ايىپ تاعىپ وتىر. مەن بۇل ايىپپەن كەلىسپەيتىنىمدى ايتتىم. ءىستىڭ استانا ەمەس، الماتىدان قارالۋى تۋرالى شاعىم تۇسىرەمىن" دەگەن ءبىلاش ءوزىنىڭ "ەشقانداي دا قورلىق-قىسىم كورمەگەنىن" دە جەتكىزدى.
بۇعان دەيىن الەۋمەتتىك جەلىدە "ۇستاۋ كەزىندە وعان كۇش قولدانىلعانى تۋرالى" بولجام دا ايتىلعان ەدى.
اقپان ايىنىڭ باسىندا الماتى قالاسى مامانداندىرىلعان اۋدانارالىق سوتى سەرىكجان ءبىلاشتى "تىركەلمەگەن بىرلەستىك جۇمىسىنا جەتەكشىلىك ەتتى" دەپ ايىپتاپ، 100 ايلىق ەسەپتىك كورسەتكىش كولەمىندە (252 مىڭ تەڭگە، شامامەن 670 دوللار) ايىپپۇل سالعان.
"ازاتتىق" راديوسى
