"Atajurt eriktileri" uıymynyń jetekshisi Serikjan Biláshti polıııa qyzmetkerleri naýryzdyń toǵyzynan onyna qaraǵan kúni Almatydaǵy qonaq úıden túngi eki jarym shamasynda ustap alyp ketken. "Qazir ol Astana qalalyq polıııa departamentinde otyr" dep habarlady qoǵamdyq uıym ókili Qaırat Baıtolla Azattyq tilshisine 10 naýryzda túste.
Onyń aıtýynsha, senbi, 9 naýryzda "Serikjan Biláshti belgisiz bireýlerdiń ańdyǵany belgili bolǵannan keıin" áriptesteri qaýipsizdik maqsatynda úıine emes, qonaq úıge barýǵa kóndirgen. Tún jarymda esikti teýip ashyp kirgen 10-15 adamnyń arasynda forma kıgenderi de, qarapaıym kıimmen júrgenderi de bolǵan. Olar Serikjan Biláshti ustap, ushaqpen dereý Astanaǵa jetkizgen.
"Tańerteń Serikjannyń ózi bizge habarlasty. Ázerbaıjan, tatar mádenı birlestikteriniń jıynynda sóılegen sózin bireýler burmalap, polıııaǵa aryzdanǵan eken. Sol aryz negizinde ustaǵan. Bul prokýratýra sankııasymen sotqa jiberilgen dúnıe emes eken. Basa-kóktep kirip, halyqty qorqytyp úrkitýge bola ma?" deıdi Qaırat Baıtolla Azattyq tilshisine.
Astana qalalyq polıııa departamenti "Atajurt eriktileri" uıymynyń jetekshisi Serikjan Biláshtiń ustalǵanyn rastady.
"10 naýryzda Astana qalalyq polıııa departamenti qyzmetkerleri áleýmettik jáne ulttyq arandatýǵa baǵyttalǵan is-áreketterge bardy degen kúdikpen Serikjan Biláshti ustady. Tergeý amaldary júrip jatyr. Tergeý múddesine oraı basqa jaıttar jarııa etilmeıdi" delingen polıııa málimdemesinde.
"Atajurt eriktileri" uıymy Facebook-taǵy paraqshasynda uıymnyń keńsesin 10 naýryzda polıııa qyzmetkerleri teksergenin de habarlady.
Naýryzdyń 10-y kúni tústen keıin "Atajurt eriktileri" uıymy Facebook-taǵy paraqshasynda Serikjan Biláshtiń vıdeomálimdemesin taratty. Onda uıym jetekshisi óziniń Astana qalalyq polıııa departamentinde otyrǵanyn, ózinen Baımaǵambetov esimdi tergeýshi suraq-jaýap alyp jatqanyn aıtty.
"Maǵan "ultaralyq arazdyq týdyrdy" degen bap boıynsha aıyp taǵyp otyr. Men bul aıyppen kelispeıtinimdi aıttym. Istiń Astana emes, Almatydan qaralýy týraly shaǵym túsiremin" degen Bilásh óziniń "eshqandaı da qorlyq-qysym kórmegenin" de jetkizdi.
Buǵan deıin áleýmettik jelide "ustaý kezinde oǵan kúsh qoldanylǵany týraly" boljam da aıtylǵan edi.
Aqpan aıynyń basynda Almaty qalasy mamandandyrylǵan aýdanaralyq soty Serikjan Biláshti "tirkelmegen birlestik jumysyna jetekshilik etti" dep aıyptap, 100 aılyq eseptik kórsetkish kóleminde (252 myń teńge, shamamen 670 dollar) aıyppul salǵan.
"Azattyq" radıosy
