قاراعاندى وبلىسىندا "جاسىل ەل" جاستار ەڭبەك جاساقتارى جاۋىنگەرلەرىنىڭ جالاقىسى ارتتى. ولار 70-تەن 105 مىڭ تەڭگەگە دەيىن الادى، دەپ حابارلايدى قاراعاندى وبلىسىنىڭ اكىمدىگى.
وڭىردە "جاسىل ەل" جاستار ەڭبەك جاساقتارىنىڭ 19-ماۋسىمىنا قاتىسۋ ءۇشىن قۇجاتتاردى قابىلداۋ اياقتالدى. 15 ناۋرىزدان 15 ساۋىرگە دەيىن ءۇش مىڭنان استام ءوتىنىش ءتۇستى.
– بۇل جوبا – 14 جاستان باستاپ بارلىق الەۋمەتتىك اۋدارىمدارمەن جۇمىسقا ورنالاسۋعا مۇمكىندىك بەرەتىن جالعىز قۇرال، - دەپ اتاپ ءوتتى جاستار ساياساتى ماسەلەلەرى باسقارماسىنىڭ باسشىسى راۋان تاران. – بيىلعى جىلى ءبىز جۇمىسپەن قامتىلعاندار سانىن وتكەن جىلمەن سالىستىرعاندا شامامەن 70%-عا ارتتىردىق. ەڭ كوپ جاۋىنگەرلەردى قاراعاندى، تەمىرتاۋ، بالقاش جانە بۇقار جىراۋ اۋداندارىندا قامتاماسىز ەتۋ جوسپارلانۋدا. اتالمىش جوبا جاستارعا قارجى تابۋ كوزى عانا ەمەس، سونىمەن قاتار ءوزارا قارىم-قاتىناس قۇرۋ، الەۋمەتتەنۋ، بايلانىس ورناتۋدى ۇيرەتەدى.
"جاسىل ەل" قاتارىنا قابىلداۋ باسىمدىعى حالىقتىڭ الەۋمەتتىك وسال توپتارىنىڭ بالالارىنا بەرىلدى. جاڭا ماۋسىمدا قاتىسۋشىلاردىڭ 40 %-عا جۋىعى – كوپ بالالى، تولىق ەمەس، از قامتىلعان وتباسىلار مەن "قانداستار" ساناتىنداعى جاسوسپىرىمدەر جانە جەتىم بالالار، سونداي-اق اتا-اناسىنىڭ قامقورلىعىنسىز قالعان بالالار.
باعدارلاماعا قاتىسۋشىلاردىڭ جالاقىسى دا جىل سايىن ارتىپ كەلەدى. بيىل 14 جاستان 16 جاسقا دەيىنگى جاۋىنگەرلەر 70 مىڭ تەڭگە الادى (كۇنىنە 4 ساعات جۇمىس ىستەيدى), 16 جاستان باستاپ – 105 مىڭ تەڭگە (كۇنىنە 6 ساعات). ولار ايماقتى كوگالداندىرۋعا، ارامشوپتەردى جۇلۋعا، گۇلدەردى سۋارۋعا، ساياباقتار مەن گۇلزارلاردى قوقىستاردان تازارتۋعا قاتىسادى.
بيىل "جاسىل ەل" جاۋىنگەرلەرىنىڭ بارلىعى جاڭا بىرىڭعاي ارنايى كيىممەن قامتاماسىز ەتىلەدى.
– باعدارلاما تانىمال، – دەپ اتاپ ءوتتى قاراعاندى وبلىسىنىڭ اكىمى ەرماعانبەت بولەكپاەۆ. – ءبىز ءوتىنىش بەرگەندەردىڭ بارلىعىن جۇمىسپەن قامتاماسىز ەتۋىمىز كەرەك. بۇل جاستار ءۇشىن جاقسى تاجىريبە. بارلىق ۇيىمداستىرۋشىلىق ماسەلەلەردى ويلاستىرىپ، ولاردى باقىلاۋدا ۇستاۋ قاجەت.
سونداي-اق، وسى جىلدان باستاپ وڭىردە پيلوتتىق رەجيمدە Jasyl el Qaragandy اۆتوماتتاندىرىلعان تسيفرلىق اقپاراتتىق جۇيەسى ەنگىزىلەدى. بۇل جاستاردىڭ "جاسىل ەل" جەج-عا قاتىسۋ ۇدەرىستەرىن ەداۋىر جەڭىلدەتۋگە مۇمكىندىك بەرەدى.
