وزبەكستاننىڭ قازىرگى باسشىسى شاۆكات ميرزيەيوۆ بۇرىنعى وكىلەتتىگىن جوققا شىعارعان رەفەرەندۋمنان كەيىن قايتادان پرەزيدەنت سايلاۋىنا كانديدات بولدى، دەپ حابارلايدى “ادىرنا” ۇلتتىق پورتالى.
وزبەكستاندا سايلاۋ مەرزىمىنەن بۇرىن 9 شىلدەدە وتەدى. ميرزيەەۆتى وزبەكستاننىڭ ليبەرالدىق-دەموكراتيالىق پارتياسى (UzLiDeP) ۇسىندى. ول ميرزيەەۆتى 2016 جانە 2021 جىلدارداعى پرەزيدەنتتىك سايلاۋعا كانديدات رەتىندە ۇسىنعان.
«بارلىق جەتىستىكتەر، ءسوزسىز، شاۆكات ميرزيەەۆتىڭ باسشىلىعىمەن جۇرگىزىلگەن رەفورمالاردىڭ ناتيجەسى» دەلىنگەن پارتيا مالىمدەمەسىندە.
ەسكە سالايىق، 8 مامىردا وزبەكستان كەزەكتەن تىس پرەزيدەنت سايلاۋىن وتكىزۋ تۋرالى جارلىققا قول قويدى.
30 ساۋىردە بۇل ەلدە كونستيتۋتسيالىق رەفەرەندۋم وتكەن. ساراپشىلار بۇل رەفورمالار ەل پرەزيدەنتىنىڭ وكىلەتتىگىن بەس جىلدان ەكى مەرزىمدىك جەتى جىلعا دەيىن ۇزارتۋ ءۇشىن ءوتتى دەپ ەسەپتەيدى. وزبەكستان ازاماتتارى وسى تۇزەتۋلەرگە داۋىس بەردى دەپ حابارلانعان سوڭ، شاۆكات ميرزيەەۆتىڭ بۇعان دەيىنگى پرەزيدەنتتىك مەرزىمى نولگە تەڭەستىرىلدى. ول جوعارى بيلىككە 2016 جىلى يسلام كاريموۆ قايتىس بولعان سوڭ، پرەمەرلىكتەن كەلگەن ەدى.
