الەۋمەتتىك جەلىدە قازاقستان ازاماتى اتانۋدا قيىندىققا تاپ كەلگەن ءبىر توپ قانداستارىمىزعا قاتىستى ۆيدەو تاراپ جاتىر. ۆيدەونى جۋرناليست سىمبات بايجوكەنوۆ ءبولىستى. قانداستاردىڭ ايتۋىنشا، ايلاپ-اپتالاپ جيناعان قۇجاتتاردى جەرگىلىكتى ميگراتسيا قىزمەتى جوعالتىپ جىبەرگەن. كوشى-قون قيىندىقتارىنان ابدەن زارەزاپ بولعان ازاماتتاردى اشۋ قىسىپ، شۋ كوتەردى، دەپ حابارلايدى "ادىرنا" ۇلتتىق پورتالى.
شۋعا تولى جيىن الماتى وبلىسىنىڭ شەلەكتە اۋىلىندا بولدى. ءجۋرناليستىڭ جازۋىنشا، 200-گە جۋىق قانداستارىمىزدىڭ ازاماتتىق الا الماي جۇرگەنىنە جىلعا جۋىق ۋاقىت بولىپتى. ونىڭ ۇستىنە، جەرگىلىكتى كوشى-قون قىزمەتى بار قۇجاتتى جوعالتىپ جىبەرگەن.
- الماتى وبلىسى، شەلەك اۋىلىندا 200-گە جۋىق قانداسىمىز ءبىر ينسپەكتوردىڭ كەسىرىنەن ەكى جىلدان بەرى قازاقستان ازاماتتىعىنا قول جەتكىزە الماي ءجۇر. وزبەكستان مەن قىتايدان قونىس اۋدارعان قازاقتار ءبىر جىل بۇرىن قىزمەتىنەن شەتتەتىلگەن ميگراتسيا ينسپەكتورى جۇمىسىن ارى قاراي جالعاستىرىپ، قۇجاتتاردى قابىلداي بەرگەنىن ايتادى. اتاجۇرتتىڭ ازاماتى اتانۋ ارمانعا اينالدى دەگەن اعايىن داۋلەت ەسىمدى ينسپەكتور دەلدالدار ارقىلى اۋىزباستىرىق الىپ وتىرعانىن دا جەتكىزدى. ەندى وسى قىزمەتكەردى شۋلاعان جۇرت تاپپاي سابىلىپ ءجۇر. كوبىنىڭ ايلاپ ءجۇرىپ جيناعان بۋما-بۋما قۇجاتتارى دا جوعالعان. ال، كوشەنى باسىنا كوتەرىپ، ايعايعا باسقان مىنا ايەل كوشى-قون قىزمەتىندە جۇمىس ىستەمەيمىن دەپ بەت باقتىرماي، تىلشىلەرگە تاپ بەردى. ءتوزىمى تاۋسىلعان قانداستارىمىز "نەگە وتىرىك ايتاسىڭ، قۇجاتتى ساعان بەردىك قوي" دەپ شۋلادى، - دەپ جازدى Cىمبات بايجوكەنوۆ.
اتاۋلى وقيعاعا قاتىستى قۇزىرلى مەكەمەلەر ءالى رەسمي اقپارات بەرگەن جوق.
"ادىرنا" ۇلتتىق پورتالى
