قىزىلوردا تۇرعىنى بيلىكتەن الەۋمەتتىك جاردەمدى كۇشەيتۋدى تالاپ ەتكەن انالار نارازىلىعىنا قاتىسقاننان كەيىن وزىنە قاتتى قىسىم جاسالىپ، "پوليتسيا ۇرىپ-سوققانىن" ايتادى. بيلىك مۇنى جوققا شىعارادى.
"تالاپ ايتقان سوڭ قىسىمعا تاپ بولدىم"
قىزىلوردا قالاسىنىڭ تۇرعىنى مەرۋەرت ءايتىموۆا وتكەن ايدا بيلىكتەن جاردەماقىنى كوبەيتۋدى، باسپانا ماسەلەسىن شەشۋدى جانە كوپ بالالى وتباسىلارعا جەڭىلدىكتەر بەرۋدى تالاپ ەتكەن انالار نارازىلىعىنا قاتىسقان. ءوز ايتۋىنشا، قالا جانە وبلىس اكىمدەرىمەن كەزدەسۋدە العاشقىلاردىڭ ءبىرى بولىپ سويلەگەن ول الەۋمەتتىك جاعدايى تومەن تۇرعىنداردىڭ اۋىر تۇرمىسىن ايتىپ، ماسەلەنى باسشىلارعا جەتكىزۋگە تىرىسقان.
كوپ ۇزاماي وعان تەلەفون شالعان بەلگىسىز بىرەۋلەر "تىنىشتالۋعا" جانە ماسەلەسىن شەنەۋنىكتەرگە جەكە ءتارتىپ بويىنشا جولىعىپ شەشۋگە كەڭەس بەرگەن.
مەرۋەرت ءايتىموۆا اقپاننىڭ 27-ءسى كۇنى قىزىلوردا قالاسى اكىمى نۇرلىبەك نالىباەۆتىڭ قابىلداۋىنان شىعىپ، وبلىس اكىمى قىرىمبەك كوشەرباەۆتىڭ قابىلداۋىنا بارعان كەزدە ونى ازاماتتىق كيىمدەگى بىرنەشە ادام كولىككە سالىپ اكەتكەنىن ايتادى. مەرۋەرتتىڭ سوزىنشە، پوليتسيا بولىمشەسىندە وعان قالا اكىمى نۇرلىبەك نالىباەۆ پەن وبلىس اكىمى قىرىمبەك كوشەرباەۆتىڭ الدىندا سويلەگەن ءسوزىنىڭ ۆيدەوسىن جانە ەكى بالاسىنىڭ سۋرەتىن كورسەتكەن. ودان WhatsApp مەسسەندجەرىندەگى انالار چاتىن جابۋدى تالاپ ەتكەن. ودان WhatsApp مەسسەندجەرىندەگى انالار چاتىن جابۋدى تالاپ ەتكەن.
- ء"بىز ساعان ەسكەرتتىك. نەگە تىنىش جۇرمەيسىڭ؟ ەگەر انالىق قۇقىعىڭنان ايىرىلىپ، قامالعىڭ كەلمەسە چاتتى جاۋىپ، تىنىش قانا ءومىر ءسۇر" دەگەن پوليتسيادا ماعان اياگوز ەسىمدى جاس ايەل. مەن ەشكىمدى كوتەرىلىسكە شاقىرماعانىمدى، تەك كوپ بالالى جانە جالعىزىلىكتى انالاردىڭ تالاپ-تىلەكتەرىن جەتكىزگەنىمدى ايتتىم، - دەيدى مەرۋەرت.
ايماقتاعى انالار دا بيلىككە تالاپپەن كەلدى
ول WhatsApp مەسسەندجەرىندە "قىزىلوردا انالارى" چاتىن اشقانىن جاسىرمايدى. وندا انالار پروبلەمالارىمەن ءبولىسىپ، ۇسىنىستارىن ورتاعا سالعان. چاتتا زاڭعا قارسى ەشقانداي ءىس-ارەكەت بولعان جوق دەپ سەندىرەدى مەرۋەرت ءايتىموۆا.
ول پوليتسياداعى "اڭگىمە" كەزىندە پوليتسيا كيىمىندەگى ايەل ونى ەكى رەت بەتىنەن ۇرعانىن، ول ەكىنشى رەت قول جۇمساعان كەزدە ۇستەلدىڭ شەتىنە قۇلاپ، اياعى اۋىر ەكەنىن ايتىپ اۋىرسىنا ايعايلاپ جىبەرگەنىن ايتىپ بەردى. بۇدان سوڭ وعان سۋ اكەلىپ بەرىپ، تىنىشتاندىرۋعا تىرىسقان بيلىك وكىلدەرى ايتىموۆامەن ۇزاق سويلەسىپ، "شي شىعارماي" تىنىش جۇرگەنى وزىنە جاقسى بولاتىنىن تۇسىندىرگەن.
مەرۋەرت ءايتىموۆا ءوزىن پوليتسيادا بەس ساعاتتان ارتىق ۇستاعانىن، تەلەفونى مەن سىرت كيىمىن الىپ قالىپ، سۋىق بولمەدە وتىرعىزعانىن ايتادى.
ءبىر ساعاتتان كەيىن كەلەمىن دەپ ەكى بالاسىن تاستاپ كەتكەن كەلىنشەكتىڭ ۇزاق ۋاقىت جوعالعانىنا الاڭداعان كورشىسى مەرۋەرتتىڭ جاقىندارىنا تەلەفون شالىپ، حابارلاعان. پوليتسيادا وتىرعان مەرۋەرتتى بۇرىنعى كۇيەۋى مەن تۋىستارى تۇنگە قاراي الىپ شىققان.
"مۇنداي فاكتى جوق"
مەرۋەرت ءايتىموۆا اقپاننىڭ 27-ىندە باسىنان قانداي جاعداي وتكەنى تۋرالى بىرنەشە كۇن بويى ەشكىمگە ايتپاعان. ول سودان بەرى وزىنە بىرنەشە رەت تەلەفون سوققان بەلگىسىز بىرەۋلەر مەسسەندجەردەگى چاتتى جاۋىپ، بەلسەندىلىگىن دوعارۋعا شاقىرعانىن جانە "ۇكىمەتپەن ويناماۋدى" ەسكەرتكەنىن ايتادى.
ناۋرىزدىڭ 4-ءى كۇنى مەرۋەرت ءايتىموۆا الماتى قالاسىنداعى بەلسەندى قۇرال مەدەۋوۆكە حابارلاسىپ، بولعان جايتتى بايانداعان. مەدەۋوۆ قىزىلوردالىق تۇرعىننان ەستىگەنىن سول كۇنى Facebook الەۋمەتتىك جەلىسىندەگى پاراعىندا جاريالاعان.
بيلىك وكىلدەرى بۇل بەلسەندىنىڭ پوستىنا جاۋاپ قاتتى. ناۋرىزدىڭ 5-ءى كۇنى قىزىلوردا قالاسىندا باق وكىلدەرى ءۇشىن ۇيىمداستىرىلعان جيىندا قۇرال مەدەۋوۆتىڭ الەۋمەتتىك جەلىدەگى جازباسىن سوزبە ءسوز وقىعان قىزىلوردا وبلىستىق پوليتسيا دەپارتامەنتىنىڭ باستىعى قايرات مۇحيتوۆ بەلسەندى تاراتقان اقپارات شىندىققا ساي ەمەس دەپ مالىمدەدى.
- ءبىز تەكسەردىك. مۇنداي دەرەك ەش جەردە ورىن الماعان. نە وبلىس اكىمدىگىندە، نە باسقا جەردە مۇنداي فاكتى جوق. پوليتسيا دەپارتامەنتى تاڭەرتەڭ بارلىق بولىمشەلەردىڭ جەتەكشىلەرىن جيناپ، تەكسەردى. مۇنداي فاكتى جوق، - دەدى مۇحيتوۆ ايماقتىق كوممۋنيكاتسيا قىزمەتىندەگى جيىندا.
پوليتسيا دەپارتامەنتىنىڭ باستىعى قازاقستاندا "كوپە-كورنەۋ جالعان اقپارات تاراتقانى" ءۇشىن قىلمىستىق جاۋاپكەرشىلىككە تارتىلاتىنىن ەسكەرتتى.
ازاتتىق ءتىلشىسى سويلەسكەن الماتىلىق بەلسەندى قۇرال مەدەۋوۆ قىزىلوردا تۇرعىنىنان تەلەفون ارقىلى ەستىگەنىن جۇرتقا جەتكىزۋدى ءجون ساناعانىن ايتادى.
- قىلمىستىق ءىس قوزعايدى دەپ شىندىقتى جاسىرىپ قالا المايمىز عوي. كەشە تۇندە ول كەلىنشەك ماعان حابارلاسىپ، ءوزىن پوليتسيا بولىمىنە قاماعانىن، تەلەفوندى ەسىك الدىندا الىپ قالىپ، پالتوسىنا دەيىن شەشىپ، جەلەڭ كويلەكپەنەن بىرنەشە ساعات سالقىن جەردە ۇستاعانىن ايتىپ بەردى. ول جايىندا بۇكىل جازبانى تەلەفونىما جازىپ الدىم. سوندىقتان ەندى مۇنى ەلدىڭ نازارىنا ۇسىنۋدى ءجون كوردىم. مۇنىڭ نەسى قىلمىس؟ – دەيدى قۇرال مەدەۋوۆ.
قىزىلوردا وبلىسى اكىمدىگى قۇرال مەدەۋوۆتىڭ Facebook الەۋمەتتىك جەلىسىندەگى جازباسىنا بايلانىستى تەكسەرۋ ءجۇرىپ جاتقانىن، ونىڭ ناتيجەسى كەيىنىرەك حابارلاناتىنىن ايتتى.
ناۋرىزدىڭ 5-ءى كۇنى قىزىلوردا قالاسىندا وتكەن بريفينگىدە وبلىس اكىمىنىڭ ورىنباسارى سەرىك شوتاەۆ اكىمدىك ەسىگى اركىمگە، سولاردىڭ اراسىندا باسپانا، جاردەماقى ماسەلەلەرى جايلى وتىنىشپەن كەلۋشىلەرگە دە ءاردايىم اشىق ەكەنىن ايتتى. اكىمدىككە كەلگەن بارلىق ارىز-وتىنىشتەر قارالىپ، وكىلەتتى ورگاندارعا جولداناتىن بولادى دەپ مالىمدەدى شەنەۋنىك.
"ازاتتىق راديوسى"
