ساياساتتانۋشى، قوعام بەلسەندىسى قۇباش مەڭدىعاليەۆ توقاەۆتىڭ رەسەي پارادىنا قاتىسۋى جايلى پىكىر ءبىلدىردى.
ايتۋىنشا، توقاەۆتىڭ بۇل ءىسى قانداي دا ءبىر ساياسي قۇپيانىڭ بار ەكەندىگىن بىلدىرمەيدى. ساياساتتانۋشى ماسكەۋدەگى جەڭىس پارادىنا قاتىسۋىنان استار ىزدەۋدىڭ ءمانى جوق ەكەنىن، ونىڭ ۇستىنە بەيرەسمي كەزدەسۋدە قانداي دا ءبىر قۇجاتقا قول قويىلماعانىن جەتكىزدى. بۇل بارىس-كەلىس رەسەي پوزيتسياسىن تۇپكىلىكتى قولداۋ دەگەندى بىلدىرمەيدى، دەدى ول.
"كوپپوليۋستى الەمدە الپاۋىتتار اراسىندا ىقپال ايماقتاردى قايتا ءبولىسۋ قارقىندى سيپات الدى. بىرنەشە باعىتتا قات-قابات كورىنبەيتىن مايدان ءجۇرىپ جاتىر. اقش ناتو-نىڭ قولىمەن، سانكتسيا جولىمەن رەسەيدى السىرەتۋگە كۇش سالسا، قىتاي بارلىق تاراپتا جۇزدەگەن ملرد. ينۆەستيتسيا ۇلەستىرىپ، سەندىرۋ ديپلوماتياسىن شەبەر قولدانۋ ارقاسىندا اقش-تىڭ الەمدەگى گەگەمونيزمىنە نۇكتە قويعىسى كەلەدى. ساۋد ارابياسى مەن يراندى كەلىسسوز ۇستەلىندە تابىستىرعان قىتاي ءوز پوليۋسىنە ءىرى ەلدەردى تارتۋدا. الپاۋىت ەلدەردىڭ بىتىسپەس تايتالاسىندا باسقا ەلدەرگە ءوز مۇددەسى ءۇشىن ديپلوماتيانىڭ بار مۇمكىندىگىن پايدالانۋدان ۇتىمدى جول جوق. قازىرگى شيەلەنىستى گەوساياسي تارتىستا بەلارۋس، قىرعىزستان، تاجىكستان، وزبەكستان، تۇركىمەنستان، ارمەنيا، قازاقستان باسشىلارىنىڭ ماسكەۋدەگى جەڭىس پارادىنا قاتىسۋىنان استار ىزدەدىك، بەيرەسمي كەزدەسۋدە قانداي دا ءبىر قۇجاتقا قول قويىلمايدى، ەكىنشىدەن، بۇل بارىس-كەلىس رەسەي پوزيتسياسىن تۇپكىلىكتى قولداۋ دەگەندى بىلدىرمەيدى. 78 جىل تولعان جەڭىس مەرەكەسىنە وراي، وڭىردەگى بۇل ەلدەر ەكىنشى دۇنيەجۇزىلىك سوعىستا ءفاشيزمدى جەڭگەن مايدانگەر بابالارعا تاعزىم ەتۋدى پارىز سانايدى. رجەۆ تۇبىندەگى قانقۇيلى شايقاستا كوزسىز ەرلىكپەن شەيىت بولعان بابالار رۋحىنا ءتاۋ ەتكەن ق.توقاەۆ وسى قادامى ارقىلى ەڭ الدىمەن قازاق مايدانگەرلەرىنىڭ قاھارماندىعىن ۇلىقتادى. قازاقستان دا كوپۆەكتورلى ساياسات ۇستاناتىن ەل رەتىندە سان تاراپتا ءوز مۇددەسىن قورعايدى" دەپ جازدى اۆتور.
"ادىرنا" ۇلتتىق پورتالى
