شەتەلدەگى 1 ملن قازاق تاريحي وتانىنا قايتۋعا نيەت تانىتىپ وتىر. بۇل تۋرالى كەشە اقپارات جانە قوعامدىق دامۋ مينيسترلىگىنىڭ كەڭەيتىلگەن القا ماجىلىسىندە دۇنيەجۇزى قازاقتارى قاۋىمداستىعى توراعاسىنىڭ ءبىرىنشى ورىنباسارى زاۋىتبەك تۇرىسبەكوۆ ايتتى، دەپ حابارلايدى قازاقپارات تىلشىسى.
«شەتتە جۇرگەن قازاقتار 4-5 ملن. دەپ ءجۇرمىز. ءبىز بارلىعىن ارالاپ شىقتىق. 1 ملن ادام ەلگە كەلەمىز دەپ وتىر. ءبىر جوبانى سارىاعاش اۋدانىندا، تاشكەنت توڭىرەگىندە جاساماقپىز. وزبەك اعايىندارمەن اقىلداسىپ، كەلىسىپ جاتىرمىز. سول جەردەن 400 گەكتار جەر الىپ، وزبەكستان جانە باسقا ەلدەردەن باستاپقىدا 35 جاسقا دەيىنگى ماماندىعى بار جاستاردى اكەلىپ، جۇمىس ورنىن قۇرىپ، ەت، ءسۇت ءوندىرىپ، ونى تاشكەنتكە جەتكىزەمىز. ارتىق ءونىمدى ەۋروپاعا نە سىبىرگە وتكىزەمىز.
قازاقتا «ەلگە ەل قوسىلسا - قۇت» دەگەن ءسوز بار. ەلباسىنىڭ ساياساتىنىڭ ارقاسىندا 27 جىلدا 1 ملن باۋىرىمىز ەلگە ورالىپ وتىر. ولاردىڭ ءبىرازى ءۇيسىز-كۇيسىز، جۇمىسسىز جۇرگەن جاعدايى بار. شەت مەملەكەتتە جۇرگەن قازاقتاردىڭ كوبى وسى جاعدايدىڭ بارلىعىن بىلەدى. سول سەبەپتەن الدىمەن ەلگە كەلگەن باۋىرلارىمىزدىڭ جاعدايىن جوندەسەك دەگەن نيەتپەن ءبىراز جۇمىس جاساپ جاتىرمىز»، - دەدى زاۋىتبەك تۇرىسبەكوۆ.
سونىمەن قاتار شەتەلدەگى قازاقتاردىڭ قازاق ءتىلىن ساقتاپ قالۋىنا قاتىستى پىكىرىمەن ءبولىستى.
«ءبىز ەرىكتىلەردى دايىنداپ، شەتتە ءومىر ءسۇرىپ جاتقان قازاق بالالارىنىڭ انا ءتىلىن 2 جاسىنان بويىنا ءسىڭىرۋدى كوزدەپ وتىرمىز. دەگەنمەن انا ءتىلىن ءبىلۋ - قازاق بولۋ ەمەس. ونىڭ نامىسى، ارى بولۋى كەرەك. سول سەبەپتەن قازاقتىڭ بويىنا سونى ءسىڭىرۋ قاجەت. سوندىقتان قىسقا-نۇسقا ءۇش مينۋتتىق روليكتەر دايىنداپ جاتىرمىز»، - دەدى ول.
