ZAÝYTBEK TURYSBEKOV: 1 MLN QANDASYMYZ QAZAQSTANǴA KELEMIZ DEP OTYR

2552
Adyrna.kz Telegram

Sheteldegi 1 mln qazaq tarıhı Otanyna qaıtýǵa nıet tanytyp otyr. Bul týraly keshe Aqparat jáne qoǵamdyq damý mınıstrliginiń keńeıtilgen alqa májilisinde Dúnıejúzi qazaqtary qaýymdastyǵy tóraǵasynyń birinshi orynbasary Zaýytbek Turysbekov aıtty, dep habarlaıdy QazAqparat tilshisi. 

«Shette júrgen qazaqtar 4-5 mln. dep júrmiz. Biz barlyǵyn aralap shyqtyq. 1 mln adam elge kelemiz dep otyr. Bir jobany Saryaǵash aýdanynda, Tashkent tóńireginde jasamaqpyz. Ózbek aǵaıyndarmen aqyldasyp, kelisip jatyrmyz. Sol jerden 400 gektar jer alyp, Ózbekstan jáne basqa elderden bastapqyda 35 jasqa deıingi mamandyǵy bar jastardy ákelip, jumys ornyn quryp, et, sút óndirip, ony Tashkentke jetkizemiz. Artyq ónimdi Eýropaǵa ne Sibirge ótkizemiz.

Qazaqta «Elge el qosylsa - qut» degen sóz bar. Elbasynyń saıasatynyń arqasynda 27 jylda 1 mln baýyrymyz elge oralyp otyr. Olardyń birazy úısiz-kúısiz, jumyssyz júrgen jaǵdaıy bar. Shet memlekette júrgen qazaqtardyń kóbi osy jaǵdaıdyń barlyǵyn biledi. Sol sebepten aldymen elge kelgen baýyrlarymyzdyń jaǵdaıyn jóndesek degen nıetpen biraz jumys jasap jatyrmyz», - dedi Zaýytbek Turysbekov.

Sonymen qatar sheteldegi qazaqtardyń qazaq tilin saqtap qalýyna qatysty pikirimen bólisti.

«Biz eriktilerdi daıyndap, shette ómir súrip jatqan qazaq balalarynyń ana tilin 2 jasynan boıyna sińirýdi kózdep otyrmyz. Degenmen ana tilin bilý - qazaq bolý emes. Onyń namysy, ary bolýy kerek. Sol sebepten qazaqtyń boıyna sony sińirý qajet. Sondyqtan qysqa-nusqa úsh mınýttyq rolıkter daıyndap jatyrmyz», - dedi ol.

Pikirler