قىزىلوردادا 15 جاستاعى ءجاسوسپىرىم شەنەۋنىك اتاندى

2075
Adyrna.kz Telegram

قىزىلوردادا 15 جاستاعى مەكتەپ وقۋشىسى قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ قىزىلوردا وبلىسى بويىنشا دەپارتامەنتى باسشىسىنىڭ شتاتتان تىس كەڭەسشىسى بولىپ تاعايىندالدى، - دەپ حابارلايدى Tengrinews.kz ءتىلشىسى.

بۇل جاڭا لاۋازىمعا قىزىلوردا قالاسىنداعى №176 ورتا مەكتەپتىڭ 9-سىنىپ وقۋشىسى دامير بوزاەۆ بەكىتىلدى. دامير - "ادال ۇرپاق" ەرىكتى مەكتەپ كلۋبىنىڭ بەلسەندى مۇشەسى، وقۋ وزاتى، بىرنەشە العىس حاتتار مەن ديپلومداردىڭ يەگەرى. شتاتتان تىس كەڭەسشى وقۋشىلار اراسىندا سىبايلاس جەمقورلىققا قارسى مادەنيەتتى قالىپتاستىرۋ باعىتىنداعى "ادال ۇرپاق" كلۋبتارىنىڭ قىزمەتىن ۇيلەستىرۋ بويىنشا قوعامدىق جۇمىستاردى اتقاراتىن بولادى.

ء"بىز وقۋشىلاردى ادال ەڭبەك ەتۋگە شاقىرىپ، سىبايلاس جەمقورلىققا قارسى تاربيەلەۋ جۇمىستارىن جۇرگىزۋدەمىز. وسى باعىتتا "ادال ۇرپاق" كلۋبتارى زور ۇلەسىن قوسۋدا. وتكەن جىلى وسى كلۋبتاردىڭ قىزمەتىن ءبىر جەردەن ۇيلەستىرۋ ماقساتىندا رەسپۋبليكادا العاشقى بولىپ وبلىستىق شتاب قۇرعان بولاتىنبىز. سوندىقتان كلۋبتاردىڭ قىزمەتىن ودان ءارى دامىتۋمەن تىكەلەي اينالىساتىن كەڭەسشىنى بەكىتىپ وتىرمىز. ءداميردى باسشىلاردىڭ ەڭ جاس كەڭەسشىسى دەسەك تە بولادى. سەبەبى، سىبايلاس جەمقورلىقتىڭ سالدارى تۋرالى جاستارعا جاستار تىلىمەن جەتكىزۋ كوپ ناتيجە بەرەدى دەپ ويلايمىز", - دەدى دەپارتامەنت باسشىسى ابزال مۇحيموۆ.

پىكىرلەر