Qyzylordada 15 jastaǵy mektep oqýshysy QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qyzylorda oblysy boıynsha departamenti basshysynyń shtattan tys keńesshisi bolyp taǵaıyndaldy, - dep habarlaıdy Tengrinews.kz tilshisi.
Bul jańa laýazymǵa Qyzylorda qalasyndaǵy №176 orta mekteptiń 9-synyp oqýshysy Damır Bozaev bekitildi. Damır - "Adal urpaq" erikti mektep klýbynyń belsendi múshesi, oqý ozaty, birneshe alǵys hattar men dıplomdardyń ıegeri. Shtattan tys keńesshi oqýshylar arasynda sybaılas jemqorlyqqa qarsy mádenıetti qalyptastyrý baǵytyndaǵy "Adal urpaq" klýbtarynyń qyzmetin úılestirý boıynsha qoǵamdyq jumystardy atqaratyn bolady.
"Biz oqýshylardy adal eńbek etýge shaqyryp, sybaılas jemqorlyqqa qarsy tárbıeleý jumystaryn júrgizýdemiz. Osy baǵytta "Adal urpaq" klýbtary zor úlesin qosýda. Ótken jyly osy klýbtardyń qyzmetin bir jerden úılestirý maqsatynda respýblıkada alǵashqy bolyp oblystyq shtab qurǵan bolatynbyz. Sondyqtan klýbtardyń qyzmetin odan ári damytýmen tikeleı aınalysatyn keńesshini bekitip otyrmyz. Damırdi basshylardyń eń jas keńesshisi desek te bolady. Sebebi, sybaılas jemqorlyqtyń saldary týraly jastarǵa jastar tilimen jetkizý kóp nátıje beredi dep oılaımyz", - dedi departament basshysy Abzal Muhımov.
