جازۋشى-دراماتۋرگ دۋمان رامازان قازاقستان جازۋشىلار وداعىنىڭ توراعالىعىنا ءوز كانديداتۋراسىن ۇسىنعان جازباسىمەن ءبولىستى، دەپ حابارلايدى "ادىرنا".
دۋمان رامازان ءوزىنىڭ Facebook پاراقشاسىندا نەلىكتەن ءوزىن توراعالىقتان كورەتىنىن مالىمدەدى.
ول بىرنەشە كريتەريلەر كورسەتىپ، ەلىمىزدەگى جازۋشى، ادەمبيەتشىلەردىڭ شىعارماشىلىعىن شىڭداۋعا قاجەت باعىت-باعداردى اتاپ ءوتتى:
"جازۋشىلار وداعىنىڭ عيماراتى بار، ونداعى جالعا بەرىلەتىن بولمەلەر بار، جيىن وتكىزەتىن كەڭ زالى بار، شىعارماشىلىق ءۇيى بار، مەملەكەتتىك تەندەرلەردەن تۇسەتىن قارجى-قاراجات بار، ەگەر ءىستىڭ ەبىن تاپسا، ءوزىن-ءوزى اقتايدى دەپ ويلايمىن. وداققا تۇسكەن ءار تيىننىڭ ورنىمەن جۇمسالۋىن قاتاڭ قاداعالاپ، ەرەكشە باقىلاۋدا ۇستاسا، وڭدى-سولدى شاشا بەرمەسە، كوپ نارسە تىندىرۋعا بولادى. جىل سايىن وداقتىڭ كىرىس-شىعىسىن ەسەپتەپ، ەسەپ بەرىپ وتىرسا، جۇرتشىلىقتا دا ەشقانداي كۇدىك-كۇمان تۋمايدى. زامانعا ساي ءبارى اشىق بولۋى كەرەك. تۇككە قاجەتى جوق جيىنداردىڭ بارلىعىن قىسقارتىپ، نەمەسە باسقاشا، جاڭاشا فورماتتا وتكىزۋدى ويلاستىرىپ، جاڭاشا جۇمىس ىستەۋگە كوشۋ كەرەك. بۇل جاعىنان العاندا دا ىستەيمىن دەگەن ادامعا قازاقستان جازۋشىلار وداعىندا مۇمكىندىك مول" دەپ جازدى ول.
پىكىرلەر بولىمىندە ءبىرشاما زيالى قاۋىم وكىلدەرى، قوعام بەلسەندىلەرى دۋمان امىرعاليۇلىن قولداپ، توراعالىق قىزمەتكە ابدەن لايىق كورىپ وتىر.
"ادىرنا" ۇلتتىق پورتالى
