بۇگىن، 30 ساۋىردە وزبەكستاندا كونستيتۋتسياعا وزگەرىس ەنگىزۋ تۋرالى رەفورما باستالدى، دەپ حابارلايدى “ادىرنا” ۇلتتىق پورتالى.
گازەتا.uz باسىلىمىنىڭ مالىمەتىنشە، ەلدە بارلىعى 10,7 مىڭ داۋىس بەرۋ ۋچاسكەسى اشىلعان. ال سايلاۋشىلاردىڭ بىرىڭعاي تىزىلىمىنە 19,7 ميلليون ازامات ەنگىزىلدى.
سايلاۋ ۋچاسكەلەرىندە قولدانىستاعى كونستيتۋتسيا مەن وزگەرىس جوسپارى، سونداي-اق 100 سۇراق-جاۋاپ جيناعى قويىلعان. ءارى كونستيتۋتسياعا ەنگىزىلەتىن وزگەرىستەر جەكەلەي ستەندتەرگە جازىلعان.
ساراپشىلاردىڭ سوزىنشە، كونستيتۋتسيانى وزگەرتۋدەگى باستى ماقسات – شاۆكات ميرزيوەۆتىڭ بيلىكتەگى مەرزىمىن جاڭارتۋ. بۇعان دەيىن ول ەكى رەت سايلانعان. ەگەر وزگەرىس قابىلدانسا، پرەزيدەنتتىك مەرزىمى 5 جىلدان 7 جىلعا دەيىن ۇزارتىلىپ، ميرزيوەۆكە 3-رەت سايلانۋعا مۇمكىندىك بەرەدى.
شاۆكات ميرزيوەۆ 2016 جىلى پرەزيدەنت بولىپ سايلاندى. جاڭا كونستيتۋتسيا وعان ەكىنشى بەس جىلدىق مەرزىمدە قىزمەت ەتىپ، تاعى جەتى جىلدان ەكى رەت پرەزيدەنت بولىپ سايلانۋعا مۇمكىندىك بەرەدى. قازىر ونىڭ جاسى 65-تە. 2040 جىلى 83 جاستا بولادى.
