وزبەكستاندا ەندى انشىلەر كونتسەرتتەرىندە فونوگرامما پايدالاناتىنى تۋرالى الدىن الا حابارلاۋعا مىندەتتەلدى، دەپ حابارلايدى “ادىرنا” ۇلتتىق پورتالى فەرعاناعا سىلتەپ.
بۇل تۋرالى 11 ناۋرىزدا ەل پرەزيدەنتى شاۆكات ميرزيوەۆ قول قويعان جاڭا زاڭعا سايكەس بەلگىلى بولدى.
وزگەرىستەر «تۇتىنۋشىلاردىڭ قۇقىقتارىن قورعاۋ تۋرالى»، «جارناما تۋرالى» جانە «مادەني قىزمەت جانە مادەني ۇيىمدار تۋرالى» زاڭدارعا ەنگىزىلدى. ەندى ونەرپازدار وزدەرىنىڭ جارنامالىق ماتەريالدارىندا كونتسەرتتە جاندى داۋىسپەن ونەر كورسەتەتىنىن نەمەسە فونوگراممانى تولىق نەمەسە ءىشىنارا پايدالاناتىنىن كورسەتۋى كەرەك. سونىمەن قاتار، كونتسەرت باعدارلاماسىندا تەك ورىنداۋشىنىڭ عانا ەمەس، ءان اۆتورلارىنىڭ دا ەسىمدەرى جازىلاتىن بولادى.
“بۇل كورەرمەندەرگە سانالى تاڭداۋ جاساۋعا كومەكتەسەدى. قانداي ءانشى ءان ايتىپ جاتىر، كىم مۋزىكا جازدى، ورىنداۋ قانشالىقتى ءتىرى، فونوگرامما قولدانىلا ما – بارلىعى ايقىن جانە اشىق بولادى،” – دەپ ءتۇسىندىردى سەنات وكىلدەرى.
سونىمەن قاتار، ەلدەگى ونەرپازداردىڭ قىزمەتىن رەتتەپ، ليتسەنزيا بەرۋمەن اينالىساتىن مەملەكەتتىك «وزبەككونتسەرت» ۇيىمىنىڭ باسشىسى اۋىستى. بۇل قىزمەتكە وديلجون ابدۋكاححوروۆ تاعايىندالدى. ول بۇعان دەيىن 2017-2020 جىلدارى وسى مەكەمەنى باسقارعان.
ول بيلىك ەتكەن كەزىندە انشىلەردىڭ ساحناداعى كيىنۋ ستيلىنە، ساقال قويۋىنا جانە پرەزيدەنتكە ارنالعان ماداق اندەرىنە سىن ايتىپ، ولاردى ءجيى تارتىپكە شاقىرعان ەدى.
جاڭا زاڭ رەسمي جاريالانعاننان كەيىن بىردەن كۇشىنە ەنەدى.
