قر وقۋ-اعارتۋ ءمينيسترى عاني بەيسەمباەۆتىڭ قىزىلوردا وبلىسىنا جۇمىس ساپارى قازالى، جالاعاش اۋداندارىندا جالعاستى.
قازالى اۋدانىنداعى ر.باعلانوۆا اتىنداعى اۋداندىق مادەنيەت ورتالىعىندا ۆەدومستۆو باسشىسى مەن وبلىس اكىمى نۇرلىبەك نالىباەۆ ءبىلىم سالاسى، قۇقىق قورعاۋ ورگاندارى قىزمەتكەرلەرىمەن، زيالى قاۋىم وكىلدەرىمەن جانە اتا-انالارمەن كەزدەستى. كامەلەتكە تولماعاندار اراسىنداعى قۇقىقبۇزۋشىلىقتىڭ الدىن الۋ ماسەلەسى بويىنشا «بالا تاربيەسى – بارشامىزعا ورتاق مىندەت» اتتى بىرلەسكەن كەڭەس وتىرىسىنا قاتىستى. جيىندا قىزىلوردا وبلىستىق پوليتسيا دەپارتامەنتى باستىعىنىڭ مىندەتىن اتقارۋشى شامشيدين اميتوۆ، وبلىستىق ءبىلىم باسقارماسىنىڭ باسشىسى مەيرامبەك شەرماعامبەت جانە اۋدان اكىمى مۇحتار ورازباەۆ بايانداما جاساپ، ۇستازدار مەن اتا-انالار ءوز پىكىرلەرىن ءبىلدىردى.
ايماق باسشىسى تاربيە ىسىندەگى باستى باعدار بالالاردىڭ قۇقىق بۇزۋشىلىققا بارماۋىن قاتاڭ قاداعالاۋ ەكەنىن، بۇل ورايدا اتقارىلۋى ءتيىس ءىس-شارالاردى اتاپ ءوتتى.
«قىزىلوردا قالاسى مەن اۋدان اكىمدەرى، وبلىستىق ءبىلىم باسقارماسىنىڭ جانە وبلىستىق پوليتسيا دەپارتامەنتىنىڭ باسشىلىعى وقۋ ورىندارى باسشىلارىمەن بىرلەسە وتىرىپ، بالالارعا قاتىستى زورلىق-زومبىلىقتى، ولاردىڭ ءوزارا قارىم-قاتىناسىنداعى كەلەڭسىزدىكتى بولدىرماۋعا باعىتتالعان جەدەل جۇمىستاردى كۇشەيتۋى ءتيىس. ول ءۇشىن وقۋشىلاردىڭ بوس ۋاقىتى دۇرىس ءارى پايدالى ەتىپ ۇيىمداستىرىلۋى كەرەك. جاستار ورتالىقتارىمەن بىرلەسىپ، قۇقىقبۇزۇشىلىققا بەيىم وقۋشىلاردى قوعامدىق شارالارعا، مەكتەپ جانىنداعى سپورت، مۋزىكا، ونەر ۇيىرمەلەرىنە كەڭىنەن تارتۋ جەمىسىن بەرەدى. سوت، پروكۋراتۋرا جانە پوليتسيا وكىلدەرىن شاقىرتىپ، جاۋاپكەرشىلىك، جاسوسپىرىمدەر جاساعان قىلمىستار مەن ءتارتىپ بۇزۋشىلىقتاردىڭ سالدارى تۋرالى وقۋ ساعاتتارىن ۇيىمداستىرسىن. بالالار قۇقىقبۇزۋشىلىققا بارماۋى ءۇشىن بەلسەندى ازاماتتار، ارداگەرلەر، اتا-انالار كوميتەتى، ءبىلىم سالاسىنا جاناشىر دەپۋتاتتار ورتاق ىسكە ازاماتتىق تۇرعىدا ءۇن قوسۋى ءتيىس»، – دەدى وبلىس اكىمى.
بايقوڭىر قالاسىنا ايالداعان قر وقۋ-اعارتۋ ءمينيسترى وسىنداعى №277 مەكتەپ-ليتسەيىندە ۇستازدار قاۋىمىمەن پىكىرلەستى. بايقوڭىر قالاسىنا ارنايى باعدارلاما جاساۋدى تاپسىرىپ، ءبىتىرۋشى تۇلەكتەرگە گرانت ءبولۋ ماسەلەسىن شەشۋ قاجەتتiگiن اتاپ ءوتتى.
ءارى قاراي ۆەدومستۆو باسشىسى مەن وبلىس اكىمى جالاعاش اۋدانىنداعى تاڭ اۋىلىنا باردى. اۋىلداعى №118 مەكتەپ ۇجىمىمەن كەزدەسىپ، جاڭا اۆتوبۋس تابىستادى. ەسكە سالساق، قىزىلوردا وبلىسى اكىمىنىڭ قولداۋىمەن ايماقتاعى اۋىل مەكتەپتەرى 30 جاڭا اۆتوبۋسپەن تولىعادى. بۇل بالالاردى مەكتەپكە جانە ۇيلەرىنە قاۋىپسىز تاسىمالداۋدى قامتاماسىز ەتۋگە مۇمكىندىك بەرەدى. كولىكتەر 20 جانە 40 ورىنعا شاقتالعان. مەكتەپ اۆتوبۋستارىنىڭ تەحنيكالىق سيپاتتامالارى بارلىق تالاپتارعا سايكەس كەلەدى. قاۋىپسىزدىك بەلدىكتەرى، اپاتتى جاعداي تۋىنداعانداعى شىعۋ جولى، جىلدامدىق شەكتەگىشتەر مەن سايكەستەندىرۋ بەلگىلەرى بار، اۆتوبۋستا بالا قالعان جاعدايدا بەلگى بەرەتىن جۇيەمەن جابدىقتالعان.
