پرەزيدەنت قازاقستان قوعامىنىڭ ورتاق يدەالدار مەن قۇندىلىقتار بىرىكتىرگەن ەركىن ءارى جاۋاپكەرشىلىگى مول ازاماتتاردىڭ وداعى ەكەنىن ايتتى. بۇل تۋرالى مەملەكەت باسشىسى قاسىم-جومارت توقاەۆ قازاقستان حالقى اسسامبلەياسىنىڭ "ادىلەتتى قازاقستان: بىرلىك، تۇراقتىلىق، دامۋ" اتتى ءحححىى سەسسياسىنىڭ وتىرىسىندا مالىمدەدى، دەپ حابارلايدى “ادىرنا” ۇلتتىق پورتالى.
سەسسيا بارىسىندا پرەزيدەنت شەتەلدە تانىمال قازاقستاندىقتاردىڭ بارلىعىن قازاق دەپ بىلەتىنىن ايتتى.
"داڭقتى وتانداستارىمىزدى، سپورتشىلارىمىزدى، مادەنيەت قايراتكەرلەرىمىزدى، عالىمدارىمىز بەن ستۋدەنتتەرىمىزدى، كاسىپكەرلەرىمىزدى شىققان تەگىنە قاراماستان، شەتەلدە ۇنەمى قازاقتار دەپ اتايدى. بۇل – تابيعي قۇبىلىس. سولاي بولۋعا ءتيىس. ءبىزدىڭ قوعام – ورتاق يدەالدار مەن قۇندىلىقتار بىرىكتىرگەن ەركىن ءارى جاۋاپكەرشىلىگى مول ازاماتتاردىڭ وداعى. بۇل – جالپىۇلتتىق بىرەگەيلىگىمىزدىڭ تاعى ءبىر جارقىن كورىنىسى", – دەدى مەملەكەت باسشىسى.
قاسىم-جومارت توقاەۆ قازاقستان ازاماتتارىنىڭ بارلىعى وزدەرىن ۇلكەن ءارى ءبىرتۇتاس قازاق وتباسىنىڭ، شىن مانىندە، قازاق ۇلتىنىڭ مۇشەسى سەزىنەتىنىن ايتا كەتتى.
ء"بىز ءبارىمىز – ءبىر وتباسىمىز. بۇل – ارتىق ايتقاندىق ەمەس. بۇل – ءبىزدىڭ شىنايى بولمىسىمىز. وسى رەتتە ءبىز ماقتانىش ەتەتىن ەتنومادەني ارالۋاندىعىمىز ەشقايدا جوعالىپ كەتپەيدى. كەرىسىنشە، ءبىرتۇتاس ازاماتتىق نەگىز ەسەبىنەن نىعايا تۇسەدى. ەلىمىزدە ءتۇرلى مادەنيەت داستۇرلەرى جالپىۇلتتىق بىرەگەيلىكتىڭ بەرىك ىرگەتاسى بولىپ قالاناتىن وزىمىزگە ءتان ايرىقشا ءومىر ءسۇرۋ سالتى قالىپتاستى. وسىناۋ ەرەكشە بىرەگەيلىگىمىز ۋاقىت تەزىنە توتەپ بەرىپ، قوعامدىق سانانىڭ وزەگىنە اينالدى", – دەدى قازاقستان پرەزيدەنتى قحا وتىرىسىندا.
