Nurjan Nurjigitov – jańa úkimetke eski úkimet quramynan jetken ákim. Onyń Jambyl oblysynyń basshysy bolyp taǵaıyndalǵanyna bir jyldan asyp barady. Úkimet úıi dálizinde Adyrna.kz tilshisi aımaqta qalyptasqan jaǵdaı jáne ákimniń synǵa ushyraǵan áreketteri týraly shaǵyn suhbat alýǵa tyrysty.
AIMAQTAǴY EŃBEK DAÝY TÝRALY
– Siz Jambylǵa ákim bolyp kelgeli Áýlıetada birneshe eńbek daýy boldy. Muny siz nemen baılanystyrasyz? Jalpy ereýilshilerdiń aldyna ózińiz nege shyqpadyńyz?
– Bizde kóbinese eńbek daýy «Qazfosfat» mekemesinde bolyp jatyr. Al endi ol kásiporyndaǵy jumystarǵa baılanysty. Sondyqtan kásiporyndar ol máseleni ózderi sheship jatyr.
– Sońǵy Jańatasta bolǵan narazylyq qalaı sheshildi?
– Aldaǵy 10 kún ishinde «Qazfosfat» JShS basshylary tarapynan bul máselege baılanysty sheshim aıtylady. Qazirgi kezde komıssııa qurylyp, jumysshylar tarapynan 10 adam jumys istep jatyr. Aldaǵy ýaqytta sheshim shyǵarylatyn bolady.
PREMERMEN BÓLE EMES...
– Áleýmettik jelide «Nurjigitov Jýalydan shyqqan óz jerlesterin basshylyq qyzmetke taǵaıyndap jatyr» degen syn jıi aıtylady. Jerlesterińizdi basshylyqqa taǵaıyndaý arqyly jumysta olqylyq ketip jatqan joq pa?
– Jýaly aýdanynan kóp adam taǵaıyndalyp jatqan joq.
– Mysaly oblys ákiminiń apparat basshysy Máten Mádı Jýaly aýdanynan eken..
– Sol bir-aq adam shyǵar apparat basshysy bolǵan. Búgingi kúni búkil aýdandardyń azamattary memlekettik qyzmetke taǵaıyndalyp jatyr.
– Áleýmettik jelide sizdiń kúıeý balańyz delingen Sultan Marat Qordaı aýdany sport bólimine basshy boldy degen aqparat shyqty. Kúıeý balańyz ekeni ras pa?
– Iá, kúıeý balam. Men oblys ákimi bolǵanǵa deıin-aq ol meniń kúıeý balam bolyp úlgergen. Ol azamat Qordaı aýdanynda maǵan deıin de jumys istep júrgen bolatyn.
– Kúıeý balańyzdyń aýdanda bólim basshysy bolýy qaıshylyq týdyrmaı ma?
– Memlekettik qyzmet týraly zańda eshqandaı qaıshylyq joq.
– Aýdan ákimi bólim basshysy kemshilik jiberse sógis bere ala ma?
– Munyń bári memlekettik qyzmet týraly zańda kórsetilgen.
– Osydan keıin kúıeý balańyzdy qyzmetten alyp tastaısyz ba? (Suraqty estı sala ákim sytylyp ketýge tyrysty) Nurjigitov myrza, nege suraqqa toqtap jaýap bermeısiz?
– Men aıtyp otyrmyn ǵoı, memlekettik qyzmet týraly zańda bári kórsetilgen. Óziniń kásibı qyzmeti men tájirıbesine baılanysty kim qandaı qyzmetke taǵaıyndalatyny jazylǵan.
– Sizdi Úkimet basshysy Álıhan Smaıylovtyń bólesi desedi. Bul aqparat ras pa?
– Biz bóle emespiz...
ÁKIM JUMYSYN ÚKIMET BAǴALAIDY DEIDI. HALYQ ShE?..
– Al jerlesterińiz «Nurjigitov oblysty durys basqara almaı jatyr» dep synaıdy...
– Oǵan endi memleket basshysy men úkimet baǵa beredi.
– Óz jumysyńyzǵa kóńilińiz tola ma?
– Memleket basshysy men úkimet tarapynan kim qalaı jumys istep jatqanyna baılanysty baǵa beriledi. Memleket basshysy ár azamat óziniń jaýapkershiligin seziný kerek dep aıtty ǵoı.
– Prezıdent ákimderdiń kóshege shyǵyp, el ishin jaıaý aralaý keregin aıtty. Sizdi kósheden kórmek túgili kabınetińizden izdep tappaı ketken kezder boldy...
– Men byltyr 35 aýyldyq okrýgqa bardym. Búgingi kúni 20-dan astam aýyldyq okrýgqa baryp, aýyl turǵyndarymen kezdestim. Osy jyldyń aıaǵyna deıin 60 jýyq aýyldyq okrýgke baryp, turǵyndarmen kezdesemiz. Bul týraly memleket basshysy tapsyrma bergen. Mindetti túrde turǵyndarmen kezdesip júrmiz. Kóptegen másele baqylaýǵa alynyp, sol jerde sheshilip jatyr.
– Sizdiń astanaǵa sózińiz óte me? -
– Ony jumys kórsetedi... (Suraqty estigen ákim sol jerden taǵy da sytylyp shyǵýǵa tyrysty)
Serik Joldasbaı
"Adyrna" ulttyq portaly
