ەكىباستۇزدا ءالى 29 جەكە ءۇي جىلۋسىز وتىر. بۇل تۋرالى بريفينگتە ەكىباستۇز قالاسىنىڭ اكىمى ايان بەيسەكين مالىمدەدى، دەپ حابارلايدى “ادىرنا” ۇلتتىق پورتالى.
“جەكە سەكتورداعى ساندار ۇنەمى وزگەرىپ وتىرادى. وتكەن تۇندە بىزدە 38-گە جۋىق جەكە تۇرعىن ءۇي جىلۋسىز قالدى، ەندى 29-ىن جىلۋ جۇيەسىنە قوسۋ قالدى.جۇمىس تاڭنان كەشكە دەيىن جالعاسۋدا. 400-گە جۋىق ادام جۇمىلدىرىلعان. جىلىتۋ ماسەلەسى بويىنشا تۇرعىنداردان كوپتەگەن سۇراقتار تۋىندايدى. كومەك قولجەتىمدى. قازىر جىلۋمەن جابدىقتاۋ جۇيەسىن تەڭگەرىمدەۋمەن اينالىساتىن بەس رەتتەگىشتەر توبى بار”، – دەدى بەيسەكين.
ونىڭ ايتۋىنشا، ەكىباستۇزدىقتارعا كومەككە پاۆلودارلىق ماماندار كەلگەن.
“ولار الداعى بىرنەشە كۇندە، مۇمكىن اپتالاردا تەڭگەرىمدەۋ جانە باپتاۋ جۇمىستارىمەن اينالىسادى. ماگيسترالدىق جەلىلەردە پارامەترلەر بار، بىراق ورامىشىلىك جانە ۇيىشىلىك جەلىلەردە قىسىم ماسەلەسى بار”، – دەپ ءتۇسىندىردى اكىم.
