كوكشەتاۋدا پوليتسەيلەر ازاماتتىق نەكەدەگى كۇيەۋىن ءولتىردى دەپ كۇدىكپەن ايەل كىسىنى قاماۋعا الدى، دەپ حابارلايدى ”ادىرنا” ۇلتتىق پورتالى.
19 ساۋىردە قالالىق پوليتسيا باسقارماسىنا وبلىس ورتالىعى تۇرعىنىنىڭ كەنەتتەن قايتىس بولعانى تۋرالى حابارلاما كەلىپ ءتۇستى.
پوليتسيا قىزمەتكەرلەرى مارقۇمنىڭ تۇرعىلىقتى جەرىنە بارعان كەزدە 45 جاستاعى ەر ادامنىڭ دەنەسىن تاپتى. ونىڭ دەنەسىندە زورلىق-زومبىلىق بەلگىلەرى انىقتالدى. تەرگەۋ-جەدەل ءىس-شارالار بارىسىندا جابىرلەنۋشىگە اۋىر دەنە جاراقاتىن سالدى دەگەن كۇدىك بويىنشا جابىرلەنۋشىنىڭ ازاماتتىق نەكەدەگى ايەلى ۇستالدى.
قايعىلى وقيعا بولعان كۇنى ازاماتتىق نەكەدەگى ەرلى-زايىپتىلاردىڭ پاتەردە جالعىز قالعانى جانە ولاردىڭ اراسىندا جانجال تۋىنداعانى انىقتالدى. جانجال كەزىندە كۇدىكتى ەر ادامنىڭ كەۋدەسىنە پىشاق سۇققان. سوت-مەديتسينالىق ساراپتاماسىنىڭ قورىتىندىسى بويىنشا، جابىرلەنۋشى العان جاراقاتىنان كوز جۇمعان.
پوليتسيا باسقارماسى وسى فاكتى بويىنشا قر قك 106-بابىنىڭ 3-بولىگى - "جابىرلەنۋشىنىڭ ولىمىنە اكەپ سوققان دەنساۋلىققا قاساقانا اۋىر زيان كەلتىرۋ" بويىنشا سوتقا دەيىنگى تەرگەپ-تەكسەرۋدى باستادى.
قازىرگى ۋاقىتتا بولعان وقيعانىڭ بارلىق ءمان-جايلارى بەلگىلەنىپ، قاجەتتى تەرگەۋ ارەكەتتەرى جۇرگىزىلۋدە. قىلمىستىق ءىس بويىنشا ايىپتالۋشىلاردىڭ جەكە باسىن سيپاتتايتىن ماتەريالدار جينالادى.
