بۇگىن قىزىلوردادا بايگەدەن قر چەمپيوناتى اياسىندا «ۇلتتىق كيىم – ۇلت اجارى» اتتى وبلىستىق ۇلتتىق كيىمدەر بايقاۋى ۇيىمداستىرىلدى. ءىس-شاراعا وبلىس اكىمى نۇرلىبەك نالىباەۆ، قر ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ جانە قر «بايگە» فەدەراتسياسىنىڭ پرەزيدەنتى قانات كوپباەۆ قاتىستى.
ەسكە سالساق، ەل پرەزيدەنتى قاسىم-جومارت كەمەلۇلى اقوردادا وتكەن اۋىزاشار داستارحانىندا ۇلتتىق ناقىشتاعى كيىم ۇلگىلەرىن كۇندەلىكتى كەڭ قولدانىسقا ەنگىزۋدىڭ ماڭىزىن اتاپ وتكەن ەدى.
«حالقىمىزدىڭ ءتول مادەنيەتى سالت-داستۇردەن، ادەت-عۇرىپتان باستاۋ الادى. ۇلتتىق كيىمنىڭ ءوزى – ۇلت مادەنيەتىنىڭ جارقىن كورىنىسى. ۇل-قىزدارىمىز ۇلتتىق كيىمدى ناۋرىز مەيرامىندا نە بولماسا باسقا مەرەكەلەردە عانا ەمەس، كۇندەلىكتى كيىپ جۇرسە جاراسىمدى بولار ەدى»، - دەدى مەملەكەت باسشىسى.
بايقاۋعا 53 قىز-كەلىنشەك قاتىستى. ۇلتتىق كيىمدەر قازاق داستۇرىنە سايكەستىگى، دايىنداۋ شەبەرلىگى مەن شىعارماشىلىق كوزقاراس تۇرعىسىنان باعالاندى.
ءىس-شارانىڭ دەمەۋشىسى 1 ميلليون تەڭگە جۇلدە قورىن ۇسىندى. بايقاۋ ناتيجەسىمەن I ورىن العان جەڭىمپاز 500 000 تەڭگە، II ورىن يەگەرى 300 000 تەڭگە، III ورىن جۇلدەگەرى 200 000 تەڭگە قارجىلاي سىيلىقتارمەن ماراپاتتالدى.
قازىلار القاسىنىڭ ءتورايىمى، قازانعاپ اتىنداعى قىزىلوردا جوعارى مۋزىكالىق كوللەدجى ديرەكتورى ۇلجان بايبوسىنوۆا جەڭىمپازداردى قۇتتىقتاپ، بولاشاقتا وسىنداي تاعىلىمدى ءىس-شارالاردىڭ ءجيى وتكىزىلۋىنە تىلەكتەستىك ءبىلدىردى.
