Búgin Qyzylordada báıgeden QR chempıonaty aıasynda «Ulttyq kıim – ult ajary» atty oblystyq ulttyq kıimder baıqaýy uıymdastyryldy. Is-sharaǵa oblys ákimi Nurlybek Nálibaev, QR Ulttyq sport qaýymdastyǵynyń prezıdenti Islambek Saljanov jáne QR «Báıge» federaııasynyń prezıdenti Qanat Kópbaev qatysty.
Eske salsaq, el Prezıdenti Qasym-Jomart Kemeluly Aqordada ótken aýyzashar dastarhanynda ulttyq naqyshtaǵy kıim úlgilerin kúndelikti keń qoldanysqa engizýdiń mańyzyn atap ótken edi.
«Halqymyzdyń tól mádenıeti salt-dástúrden, ádet-ǵuryptan bastaý alady. Ulttyq kıimniń ózi – ult mádenıetiniń jarqyn kórinisi. Ul-qyzdarymyz ulttyq kıimdi Naýryz meıramynda ne bolmasa basqa merekelerde ǵana emes, kúndelikti kıip júrse jarasymdy bolar edi», - dedi Memleket basshysy.
Baıqaýǵa 53 qyz-kelinshek qatysty. Ulttyq kıimder qazaq dástúrine sáıkestigi, daıyndaý sheberligi men shyǵarmashylyq kózqaras turǵysynan baǵalandy.
Is-sharanyń demeýshisi 1 mıllıon teńge júlde qoryn usyndy. Baıqaý nátıjesimen I oryn alǵan jeńimpaz 500 000 teńge, II oryn ıegeri 300 000 teńge, III oryn júldegeri 200 000 teńge qarjylaı syılyqtarmen marapattaldy.
Qazylar alqasynyń tóraıymy, Qazanǵap atyndaǵy Qyzylorda joǵary mýzykalyq kolledji dırektory Uljan Baıbosynova jeńimpazdardy quttyqtap, bolashaqta osyndaı taǵylymdy is-sharalardyń jıi ótkizilýine tilektestik bildirdi.
