Twitter تانىمال ادامداردىڭ، ساياساتكەرلەر مەن ونەرپازداردىڭ، جۋرناليستەردىڭ "كوك بەلگىسىن" جويىپ، ولاردىڭ اقپارات كەڭىستىگىندەگى مارتەبەسىن جاڭعىرتتى. ريم پاپاسى، دجوان روۋلينگ جانە قاسىم-جومارت توقاەۆ Twitter-دەگى "كوك بەلگىسىنەن" ايىرىلدى، دەپ حابارلايدى "ادىرنا" ۇلتتىق پورتالى.
و باستا Twitter-دەگى "كوك بەلگى" قولدانۋشىلاردى الاياقتاردىڭ ارەكەتىنەن قورعاپ، جالعان اقپاراتپەن كۇرەسۋدىڭ "تۇمارى" بولعان ەدى. ۋاقىت وتە كەلە مۇنداي ايرىقشا تاڭبانى قالتاسى قالىڭ كەز كەلگەن ادام ساتىپ الا باستادى.
سول سەبەپتەن، Sky News-ءتىڭ جازۋىنشا، الەمگە ىقپالدى، تانىمال تۇلعالاردىڭ تۆيتتەگى مارتەبەسى جويىلدى.
توقاەۆتىڭ "تاعدىرلاستارى" دا، ريم پاپاسى، جازۋشى دجوان روۋلينگ، فۋتبول جۇلدىزى كريشتيانۋ رونالدۋ، امەريكالىق رەپەر دجەي-ز، الەۋمەتتىك جەلىدەگى پاراقشالارىنداعى "كوك بەلگىدەن" ايىرىلدى. تۆيتتەردە مۇنداي بەلگىگە يە 300 مىڭعا جۋىق قولدانۋشى بولعان.
ەندىگىدە"كوك بەلگىنى" ايىنا 11 دوللار تولەپ، Twitter Blue-گە جازىلعان ادامدار عانا الا الادى. ءتۇرلى-ءتۇستى وزگە بەلگىلەر قولدانۋشىنىڭ قوعامداعى ورنىن ايقىندايدى. ياعني: التىن ءتۇس - بيزنەس وكىلدەرى، ال سۇر ءتۇس - ۇكىمەت، كوپجاقتى ۇيىمنىڭ وكىلدەرى نەمەسە رەسمي تۇلعا.
14 ناۋرىزدا پرەزيدەنت قازاقستان حالقىن امال مەرەكەسىمەن قۇتتىقتاعاندا پاراقشاسىنداعى كوك ءتۇس بولعان.
سۋرەت: Twitter/TokayevKZ
ورايى كەلگەندە ايتا كەتەيىك، تۆيتەردىڭ سۇر بەلگىسى مەملەكەت باسشىلارى (پرەزيدەنتتەر، مونارحتار جانە پرەمەر-مينيسترلەر), مەملەكەت باسشىلارىنىڭ ورىنباسارلارى (ۆيتسە-پرەزيدەنتتەر، پرەمەر-مينيسترلەردىڭ ورىنباسارلارى), ۇلتتىق دەڭگەيدەگى مينيسترلەر كابينەتىنىڭ مۇشەلەرى، اتقارۋشى بيلىكتىڭ باس وكىلى، سونداي-اق ۇلتتىقتان جوعارى نەمەسە ۇلتتىق كونگرەسستىڭ، پارلامەنتتىڭ بارلىق پالاتالارىنىڭ جەكە مۇشەلەرىنە تاڭىلعان.
"ادىرنا" ۇلتتىق پورتالى
