كەشە عانا جاڭاوزەندەگى جاعدايدى حابارلاعان بولاتىنبىز. جۇمىس ىزدەپ اشىنعان حالىق ون كۇندەي كوشەگە شىعىپ، بيلىكتەن ەكى قولعا ءبىر كۇرەك سۇراعان ەدى.
حالىقتىڭ قويىپ وتىرعان تالابى الەۋمەتتىك ماسەلەلەر. جۇمىسسىز ازاماتتارعا جۇمىس تاۋىپ بەرۋ. سوسىن، جاستار ماسەلەسى. سەبەبى، موراتوري جاريالانعالى ديپلوم العان جاستار جۇمىسقا قابىلدانباي قالدى. باتىس ءوڭىر مۇنايلى ولكە بولعاندىقتان بۇل جاقتىڭ جاستارى مەكتەپ بىتىرىسىمەن مۇناي-گاز سالاسىنا وقۋعا تۇسەدى. ماڭعىستاۋمۇنايگاز بەن وزەنمۇنايگازعا جۇمىسقا تۇرۋعا تىرىسادى.
وسى جولعى حالىقتىڭ تالابى مۇناي كومپانيالارى عانا بولماي تۇر. "وزەنمۇنايگازعا ورىن جوق بولسا جوق شىعار، تۇسىنەمىز. كاسپيدىڭ جاعاسى كەڭ عوي. سول جەردەن بالىق اۋلايتىن، بالىق وڭدەيتىن، شپروت، كيلكا شىعاراتىن زااۋىتتار سالىپ بەرسىن. حالىقتى جۇمىسپەن قامتاماسىز ەتەدى، ءارى ءوز ءونىمىمىزدى پايدالانامىز. ءوز بەتىڭمەن بارىپ بالىق اۋلاساڭ براكونەر رەتىندە سوتتالاسىڭ" دەدى بىزگە حابارلاسقان جاڭاوزەندىك تۇرعىن.
رەداكتسيامىزعا حابارلاسقان جەرگىلىكتى تۇرعىندار جاستارعا سولتۇستىك وڭىرلەرگە باعدارلامامەن بارۋعا كەڭەس بەردى دەيدى. بىراق، جاڭاوزەننەن پروپيسكادان شىعىپ كەتسەڭىز، قايتادان وتىرا المايسىڭ دەيدى. ويتكەنى، قالاعا حالىق سىيماۋدا ەكەن. بۇل قايدان شىققان زاڭ ەكەنىن.
جاڭاوزەن جازىقتى، شولەيتتى ءوڭىر. بۇل جەردە سۋ تاپشى. سوندىقتان باسقا وڭىرلەرگە قاراعاندا كوكونىس، جەمىس-جيدەك قىمبات. ولقىلىقتىڭ ورنىن تولتىرۋ ماقساتىندا ميلليونداعان اقشاعا جىلىجاي دا سالىنىپتى. حالىقتى ارزان كوكونىسپەن قامتاماسىز ەتۋگە. "سول جىلىجايدى اقمولالىق كاسىپكەر جەكەمەنشىككە ساتىپ الىپتى دەپ ەستىدىك. ول جىلىجاي قيار ەگەدى ەكەن. ونىڭ ءوزىن جازدىگۇنى" دەدى تاعى ءبىر جەرگىلىكتى تۇرعىن.
جاڭاوزەندىكتەردىڭ ايتۋىنشا ەشقانداي ساياسي تالاپ قويىپ وتىرعان جوق. تەك قانا جۇمىس سۇراپ وتىر. بالا-شاعامىزدىڭ قارنى توق، كويلەگى كوك بولسا دەيدى. جاستاردا بىتىرگەن ماماندىعىمىزبەن جۇمىسقا تۇرساق دەگەن تىلەك.
ال، رەسمي بيلىك تاراپىنان رەسمي اقپارات تاراتىلماعاندىقتان الەۋمەتتىك جەلى بەتىنەن نەشە ءتۇرلى اقپارات جەلدەي ەسۋدە. ءبىزدىڭ اقپاراتتىق يدەولوگيامىزدىڭ قانداي جاعدايدا ەكەنىن قاراعاندى وقيعاسى كورسەتىپ بەرگەن بولاتىن. وتكەننەن ساباق المايتىنىمىز-اي.
P.S. ءدال قازىرگى ساتتە جاڭاوزەن تىنىشتالدى. ماڭعىستاۋ وبلىسىنىڭ اكىمى ەرالى توعجانوۆ حالىققا ماسەلەنىڭ شەشىلەتىنىن، جاعدايدىڭ باقىلاۋدا ەكەنىن ايتتى. ءتورت جەردەن جۇمىسقا قابىلداۋ باستالدى. "وزەنينۆەست" كاسىپورنىنان 350 ادامعا جاڭا جۇمىس ورنى اشىلدى. 49 ازامات سول جەردە جۇمىسقا قابىلدانىپتى. جۇمىس سۇراعان حالىقتىڭ الدى جۇمىسقا جونەلتىلۋدە.
وڭعار قابدەن
"ادىرنا" ۇلتتىق پورتالى
