تومسك مەملەكەتتىك ۋنيۆەرسيتەتىندە وقيتىن قازاقستان ازاماتى مارعۇلان بەكەنوۆ رەسەيلىك «ۆاگنەر» جەكە اسكەرىنىڭ قاتارىندا ۋكرايناداعى سوعىسقا اتتانعان. بۇل تۋرالى «سيبير.رەالي» رەداكتسياسىنا ونىڭ اناسى الميرا بەكەنوۆا ايتتى، دەپ حابارلايدى «ادىرنا» ءتىلشىسى.
«ناۋرىز ايىندا تومسكىدەن كراسنودار ولكەسىنە «قىزىما بارامىن» دەپ كەنەتتەن كەتكەنىن بىلگەندە تاڭعالدىق. كەيىن بەلگىسىز بىرەۋلەر ونى ۇرلاپ اكەتىپ، اسكەري توپقا قوسقانى بەلگىلى بولدى. بالاممەن مولكينو حۋتورىندا كەزدەسۋگە مۇمكىندىك الدىم، بارلىق جەردە رەسەيلىك جەكە اسكەري جاساقتىڭ پلاكاتى ءىلۋلى تۇر. مارعۇلانمەن دۇرىس سويلەسۋگە مۇمكىندىك بەرمەدى. جاعدايى ناشارلاپ كەتكەن. الايدا ول ەشقانداي كەلىسىمشارتقا قول قويماعانىن جەتكىزدى»،—دەيدى جىگىتتىڭ اناسى.بەكەنوۆتەر وتباسى 22 جاستاعى قازاقستاندىقتىڭ زاڭسىز قاماۋعا الىنعانى تۋرالى اقپاراتتى قازاقستان مەن رەسەيدىڭ اسكەري پروكۋراتۋراسىنا، ىشكى ىستەر مينيسترلىگىنە حابارلاعان. ءتىپتى ەكى ەلدىڭ پرەزيدەنتىنە دە حات جولداعان. الايدا رەسمي وتىنىشتەردەن ەشقانداي ناتيجە بولماعان.
«رەسەيلىك جەكە اسكەري جاساق ۇلىمدى 12 ساۋىردە مايدانعا جىبەردى»،—دەيدى الميرا بەكەنوۆا.قازاقستان سىرتقى ىستەر مينيسترلىگى بۇل وقيعاعا قاتىستى تۇسىنىكتەمە بەردى. باسقارمانىڭ ايتۋىنشا، مارعۇلان بەكەنوۆ قاتارعا ءوز ەركىمەن قوسىلعان.
«ازامات «ۆاگنەر» جەكە اسكەر توبىمەن ەرىكتى تۇردە كەلىسىمگە قول قويعان. قازىرگى تاڭدا اقپاراتتى تەكسەرىپ جاتىرمىز»،—دەپ ءتۇسىندىردى مينيسترلىكتىڭ رەسمي وكىلى ايبەك سمادياروۆ.اقپارات باق بەتىندە تارالعاننان كەيىن قازاقستاندىق ستۋدەنت كوپشىلىككە ۇندەۋ جاسادى.
«كومپانياعا ەرىكتى تۇردە كەلدىم. سوعىس وپەراتسيالارىنا ءوز ۇلەسىمدى قوسقىم كەلەدى. بۇل جەردە ءوزىمدى تاماشا سەزىنەمىن. ءوزىمدى تاپتىم. ماعان بارلىعى ۇنايدى»،—دەدى مارعۇلان بەكەنوۆ.«ۆاگنەر» — سيرياداعى، افريكا ەلدەرىندەگى جانە ۋكرايناداعى سوعىس وپەراتسيالارىنا قاتىساتىن رەسەيلىك بەيرەسمي اسكەري ءبولىم. ول ۆلاديمير ءپۋتيننىڭ اسپازى ەۆگەني پريگوجينگە تيەسىلى. ەسكە سالايىق، ەلىمىزدە وزگە مەملەكەتتەردىڭ اۋماعىنداعى سوعىس قيمىلدارىنا قاتىسقان قازاقستاندىق ازاماتتار قىلمىستىق جاۋاپكەرشىلىككە تارتىلادى. بەينەجازبانى كورۋ ءۇشىن سىلتەمەنى باسىڭىز.
