قىزىلوردا وبلىسىندا 22 ءساۋىر كۇنى بايگەدەن قر چەمپيوناتىنىڭ ىرىكتەۋ كەزەڭى وتەدى. بۇل تۋرالى وڭىرلىك كوممۋنيكاتسيالار قىزمەتىنىڭ اقپارات الاڭىندا وتكەن بريفينگتە وبلىستىق مادەنيەت جانە سپورت باسقارماسى باسشىسىنىڭ ورىنباسارى اسىلجان جامانقۇل مالىمدەدى.
-بۇگىندە يپپودروم سايىستى وتكىزۋگە تولىقتاي دايىن. وتكەن بايگەلەرگە قاراعاندا تىركەلگەن اتتار سانى كوپ. سايىسقا قاتىسۋشى سپورتشىلار توپ بايگە، قۇنان بايگە جانە الامان بايگە بويىنشا سىنعا تۇسەدى. جۇلدە قورى – 35600000 تەڭگەنى قۇراماق. الامان بايگەنىڭ جەڭىمپازى Astana Motors كومپانياسىنىڭ دەمەۋشىلىگىمەن اۆتوكولىك يەمدەنەدى. بايگە وتە جوعارى دەڭگەيدە ءوتىپ، حالىقتىڭ كوڭىلىن كوتەرەدى دەپ سەنەمىز،-دەدى اسىلجان زۇلفقارۇلى.
-اۋقىمدى دايىندىقتار بۇگىندە ءوز مارەسىنە جەتتى. بايگەدەن بولەك، قىز-كەلىنشەكتەرگە ارنالعان «ۇلتتىق كيىم – ۇلت اجارى» اتتى كوستيۋمدەر بايقاۋى وتەدى. بۇل بايقاۋعا ەلۋدەن اسا بايقاۋشى ءوز باعىن سىناپ كورەدى. وعان قاتىساتىن بويجەتكەندەر ۇلتتىق كيىممەن شىعىپ ستيل جاعىنان سىنعا تۇسەدى. جۇلدە قورى – 1 ملن. تەڭگەنى قۇرايدى. سونداي-اق جۇلدە 500 مىڭ تەڭگەنى قۇرايتىن قول كۇرەس، ارقان تارتۋ، گىر كوتەرۋدەن سايىستار وتكىزىلەدى.-دەدى Kazpetrol Group-تىڭ PR مەنەدجەرى مەيرامكۇل حودجاەۆا.
-بيىلعى جىلى رەسپۋبليكا بويىنشا جەتى ىرىكتەۋ كەزەڭى بولادى. ال سوڭعى قورىتىندى كەزەڭى جامبىل وبلىسىندا وتەدى. ءبىرىنشى كەزەڭى 22 ءساۋىر كۇنى سىر ەلىندە باستاۋ الادى. قىزىلوردا وبلىسىنان قىرىق ات ىرىكتەلىپ الىندى. دايىندىقتارى وتە جاقسى. جالپى رەسپۋبليكا تاراپىنان 210 شاباندوز ءوز باعىن سىنايدى،-دەدى قىزىلودا وبلىستىق بايگە فەدەراتسياسىنىڭ پرەزيدەنتى ءادىلجان ىزتىلەۋوۆ.
ايتا كەتەيىك، شارا قىزىلوردا وبلىسى اكىمدىگىنىڭ قولداۋىمەن بايگە فەدەراتسياسى رەسپۋبليكالىق بىرلەستىگىنىڭ ۇيىمداستىرۋىمەن وتەدى. سونداي-اق شاراعا Kusto group, Compass, Kazpetrol Group كومپانيالارى سەرىكتەستىك ەتەدى.
