ەڭ الدىمەن مەملەكەت باسشىسى نۇرسۇلتان نازارباەۆ اسقار ءماميندى قر پرەمەر-ءمينيسترى لاۋازىمىنا تاعايىنداۋ تۋرالى جارلىققا قول قويدى.
پرەمەر-ءمينيستردىڭ ءبىرىنشى ورىنباسارى - قارجى ءمينيسترى لاۋازىمىنا ءاليحان سمايلوۆ تاعايىندالدى.
سونىمەن بىرگە، قر يندۋستريا جانە ينفراقۇرىلىمدىق دامۋ مينيسترلىگىن باسقارعان جەڭىس قاسىمبەك پرەمەر-ءمينيستردىڭ ورىنباسارى بولدى.
ەلباسى جارلىعىمەن گۇلشارا ناۋشاقىزى ابدىقالىقوۆا قازاقستان رەسپۋبليكاسىنىڭ مەملەكەتتىك حاتشىسى قىزمەتىنەن بوساتىلىپ، قازاقستان رەسپۋبليكاسى پرەمەر-ءمينيسترىنىڭ ورىنباسارى بولىپ تاعايىندالدى.
قر سىرتقى ىستەر ءمينيسترى لاۋازىمىندا بەيبىت اتامقۇلوۆ قىزمەت ەتەدى.
تاعايىندالعانىنا كوپ ۋاقىت وتە قويماعان قر ىشكى ىستەر ءمينيسترى ەرلان تۇرعىمباەۆ تا ءوز قىزمەتىندە قالدى.
نۇرلان ەرمەكباەۆ قر قورعانىس ءمينيسترى لاۋازىمىندا ءوز قىزمەتىن جالعاستىرادى.
قر يندۋستريا جانە ينفراقۇرىلىمدىق دامۋ ءبىرىنشى ۆيتسە-ءمينيسترى قىزمەتىن اتقارعان رومان سكليار پرەزيدەنت جارلىعىمەن يندۋستريا جانە ينفراقۇرىلىمدىق دامۋ ءمينيسترى لاۋازىمىنا تاعايىندالدى.
سونداي-اق، بۇگىن ءبىلىم جانە عىلىم مينيسترلىگىنە جاڭا باسشى تاعايىندالدى. بۇل قىزمەتكە «نازارباەۆ زياتكەرلىك مەكتەپتەرى» دببۇ باسقارما ءتورايىمى بولعان كۇلاش شامشيدينوۆا تاعايىندالدى.
اقتوبە وبلىسىنىڭ اكىمى بولعان بەردىبەك ساپارباەۆ قر ەڭبەك جانە حالىقتى الەۋمەتتىك قورعاۋ ءمينيسترى بولىپ تاعايىندالدى.
قر پرەمەر-ءمينيسترىنىڭ ورىنباسارى بولعان اسقار جۇماعاليەۆ جاڭادان قۇرىلعان قر تسيفرلىق دامۋ، قورعانىس جانە اەروعارىش ونەركاسىبى مينيسترلىگىنىڭ باسشىسى بولىپ تاعايىندالدى.
سونداي-اق، قر اۋىل شارۋاشىلىعى مينيسترلىگىنە جاڭا مينيستر كەلدى. بۇل لاۋازىمعا ساپارحان وماروۆ تاعايىندالدى.
قر ۇلتتىق ەكونوميكا مينيسترلىگىنە رۋسلان دالەنوۆ تاعايىندالدى.
قر اقپارات جانە كوممۋنيكاتسيالار ءمينيسترى بولعان داۋرەن اباەۆ قايتا قۇرىلعان اقپارات جانە قوعامدىق دامۋ ءمينيسترى بولىپ تاعايىندالدى.
مادەنيەت جانە سپورت ءمينيسترى لاۋازىمىندا ارىستانبەك مۇحامەديۇلى وزگەرىسسىز قالدى.
ەنەرگەتيكا مينيسترلىگىن دە قانات بوزىمباەۆ باسقاراتىن بولادى.
دەنساۋلىق ساقتاۋ ءمينيسترى قىزمەتىندە ەلجان بيرتانوۆ قالادى.
قر ادىلەت ءمينيسترى بولعان مارات بەكەتاەۆ تا ءوز قىزمەتىندە قالدى.
سونىمەن بىرگە، مەملەكەت باسشىسى نۇرسۇلتان نازارباەۆ ەربولات دوساەۆتى ۇلتتىق بانك توراعاسى لاۋازىمىنا تاعايىنداۋ تۋرالى جارلىققا قول قويدى.
"قازاقپارات" اگەنتتىگى
