بۇگىن سىر وڭىرىنە ارنايى جۇمىس ساپارىمەن كەلگەن اۋىل شارۋاشىلىعى ءمينيسترى ەربول قاراشوكەەۆ اۋىل شارۋاشىلىعى تاۋاروندىرۋشىلەرىمەن كەزدەسىپ، سالاداعى وزەكتى ماسەلەلەردى تالقىلادى.
وبلىس اكىمى نۇرلىبەك نالىباەۆ ۆەدومستۆو باسشىسىنا ۇكىمەت تاراپىنان كورسەتىلگەن قولداۋ ءۇشىن ريزاشىلىعىن ءبىلدىردى.
«سوڭعى جىلدارى ورىن العان سۋ تاپشىلىعىنا قاراماستان سىر ديقاندارى مەملەكەت باسشىسى مەن ۇكىمەت تاراپىنان كورسەتىلگەن قولداۋدىڭ ارقاسىندا ەگىننەن مول ءونىم الىپ، سالادا ءوسىم ديناميكاسى قالىپتاستى. تاماق ونىمدەرىن وڭدەۋ كولەمى وتكەن جىلدىڭ قورىتىندىسىمەن 6,3 پايىزعا ارتتى. بىلتىر اۋىل شارۋاشىلىعىنىڭ نەگىزگى قورىنا 9,9 ملرد. تەڭگە ينۆەستيتسيا سالىنىپ، 2021 جىلمەن سالىستىرعاندا 8 پايىزعا ارتسا، بيىلعى قاڭتار-اقپان ايلارىندا وتكەن جىلدىڭ سايكەس كەزەڭىمەن سالىستىرعاندا 13,2 ەسە ءوستى.
وتكەن جىلى سالانى سۋبسيديالاۋعا 11,9 ملرد. تەڭگە قارجى بولىنسە، بيىل 13,8 ملرد. تەڭگە قارالدى. سىر ديقاندارى 195,6 مىڭ گەكتارعا اۋىل شارۋاشىلىعى داقىلدارىن ەگۋدى جوسپارلاۋدا. ونىڭ ىشىندە نەگىزگى داقىل – كۇرىش كولەمى 83,9 مىڭ گەكتار كولەمىندە مەجەلەنگەن»، – دەدى ايماق باسشىسى.
ەربول قاراشوكەەۆ بيىلعى سۋبسيديالاۋ ەرەجەلەرىمەن تانىستىرىپ، اۋىل شارۋاشىلىعى جەرلەرىن ءتيىمدى پايدالانۋ ماسەلەلەرىن تالقىعا سالدى.
جيىنعا وبلىستىڭ اۋىلشارۋاشىلىعى سالاسىنىڭ وكىلدەرى، قالا جانە اۋدان اكىمدەرى بەينەكونفەرەنتسيا بايلانىسى ارقىلى قاتىستىپ، ءوز سۇراقتارىن قويدى.
«ابزال ي ك» تس باس اگرونومى ا.الياكباروۆ، «اقتوبە ي ك» جشس ديرەكتورى ن.ىزدىباەۆ، «اقجارما ي ك» جشس باس اگرونومى ع.ىزتىلەۋوۆ، «سەيتجانوۆ»، شق توراعاسى ش.سەيتجانوۆ، «رك مۇناي» جشس قۇرىلتايشىسى ر.نۇرجانوۆا جانە «ەر-ءالى» شارۋا قوجالىعىنىڭ توراعاسى ءا.بەكجانوۆ ۇسىنىس-پىكىرلەرىن جەتكىزدى.
ايتا كەتەيىك، قر اۋىل شارۋاشىلىعى ءمينيسترى سىر وڭىرىنە ساپارى بارىسىندا سىرداريا اۋدانى ن.ءىلياسوۆ اۋىلىنداعى كوركەيتۋ كوگالداندىرۋ، اباتتاندىرۋ جۇمىستارىن كورىپ، رەسپۋبليكا كولەمىندە وتەتىن اۋىلدى دامىتۋ تاقىرىبىنداعى سەمينارعا دايىندىق ماسەلەلەرىن پىسىقتادى. جەكە قابىلداۋ وتكىزىپ، جەرگىلىكتى باق وكىلدەرىنە بريفينگ بەردى جانە قىزىلوردا قالاسىنداعى اۋىل شارۋاشىلىعى قۇرىلىمدارى جۇمىسىمەن تانىستى.
انىقتاما ءۇشىن: وتكەن جىلمەن سالىستىرعاندا وبلىستا جالپى ەگىس كولەمىن 7,0 مىڭ گەكتارعا، ونىڭ ىشىندە كۇرىش كولەمىن 5,3 مىڭ گەكتارعا، مال ازىقتىق داقىلداردى 2,3 مىڭ گەكتارعا، كارتوپ، كوكونىس، باقشا كولەمىن 222 گەكتارعا ۇلعايتۋ كوزدەلۋدە. ۆەگەتاتسيا كەزەڭىنە سۋ ءليميتى بەلگىلەنگەننەن كەيىن ەگىس كولەمى ناقتىلاناتىن بولادى.
سۋ تاپشىلىعىن ەسكەرە وتىرىپ، اۋىل شارۋاشىلىعىن ءارتاراپتاندىرۋ ءۇشىن سوڭعى 2 جىلدا وبلىستا كۇرىش كولەمى 11 مىڭ گەكتارعا دەيىن قىسقارتىلىپ، ورنىنا سۋدى از قاجەت ەتەتىن داقىلدار كولەمى 17,1 مىڭ گەكتارعا ۇلعايتىلدى. 1,0 مىڭ گەكتارعا سۋ ۇنەمدەۋ تەحنولوگياسىن قولدانۋ ارقىلى ەگىن ەگىلسە، بيىل 667 گەكتارعا قولدانىلاتىن بولادى. 2030 جىلعا دەيىن ونىڭ كولەمىن 17,2 مىڭ گەكتارعا جەتكىزۋ جوسپارلانۋدا. بيىل ۋكراينا عالىمدارىمەن تاجىريبە رەتىندە دەمونستراتسيالىق القاپقا ءارتاراپتاندىرۋ باعىتىنداعى داقىلداردى ەگۋ قولعا الىندى. قازىر كوكتەمگى دالا جۇمىستارى مەن ەگىن ەگۋ ناۋقانى كەستەگە ساي جۇرۋدە، ديقاندار تۇقىم، تىڭايتقىش، تەحنيكا جانە جانار-جاعارمايمەن تولىق قامتىلعان.
