“قىتاي قاپتايدى”، “قىتاي جاۋلايدى” دەگەن جازبالار فەيسبۋكتە قاپتاپ كەتىپتى. ول كەشە شىققان “قازاقستان مەن قىتاي ازاماتتارى 30 كۇن ۆيزاسىز جۇرە الادى” دەگەن اقپاراتقا بايلانىستى جازىلۋدا.
ال ماسەلەگە باسقا قىرىنان ءۇڭىلىپ قاراساق، ەشقانداي دا قىتاي قاپتامايدى. 2022 جىلى ءبىز “قىتاي ازاماتتارى 14 كۇن ۆيزاسىز جۇرە الاتىن” وزگەرىس ەنگىزگەنبىز. ءبىر جىلعا جۋىق ۋاقىت بولدى، قاپتاعان قىتاي كورمەدىم. ءدال سول سياقتى بولادى.
قىتايدىڭ جالپى ءبىزدىڭ ازاماتتار ءۇشىن 30 كۇن ۆيزاسىز رەجيمگە رۇقسات ەتكەنى جاقسى جاڭالىق. قىتاي ەلشىلىگىنىڭ الدىندا ۆيزا الۋعا ءتىزىلىپ كەزەك تۇراتىن. قىتايدان كەلگەن قانداس دوستارىم جەتەرلىك، سولاردىڭ تۋىستارى، تانىستارى ۆيزا الۋ ءۇشىن ايلاپ قۇجات جيناپ جۇرەتىن. “انا جەردەن انىقتاما اكەل، مىنا جەردەن قۇجات اكەل” دەپ شاپقىلايتىن. ال ەندى مىناۋ ول ازاماتتار ءۇشىن جاقسى جاڭالىق قوي. التايدىڭ ارعى بەتىندەگى قانداسقا دا ءتيىمدى. ونىڭ ۇستىنە قىتايعا دەمالۋعا، مەديتسيناسى جاقسى بولعاندىقتان ەم الۋعا باراتىندار دا جەتكىلىكتى. ولار ءۇشىن دە اۋرە-سارساڭ ازايدى. ەڭ ءتيىمدىسى كاسىپكەرلەرگە دەپ ويلايمىن. وتكەن جىلى قازاقستان-قىتاي ساۋدا قاتىناسى العاش رەت رەسەيدى ارتتا قالدىردى. ياعني ءبىز ءۇشىن قىتاي باستى ەكونوميكالىق، ساۋدا قاتىناستاعى سەرىكتەسكە اينالدى دەگەن ءسوز. قىتايعا كىرىپ، كاسىپ جاساپ، تابىس كوزىن ىزدەپ، شاپقىلاپ جۇرگەن جاندارعا ۋاقىت جاعىنان دا، قارجى جاعىنان دا ءتيىمدى بولدى دەۋگە بولادى.
سوندىقتان ماسەلەگە وسى قىرىنان دا قاراۋ كەرەك. ەموتسيانى جيىپ قويىپ، بۇل جاڭالىققا قىتايعا كىرۋ ءۇشىن ۆيزا الۋعا تابان توزدىرعان قازاقتىڭ كوزىمەن دە قاراۋ كەرەك.
