«AMANAT» frakııasynyń depýtaty Rınat Zaıytov Májilistiń keshegi jalpy otyrysynda alǵashqy depýtattyq saýalyn Premer-mınıstrdiń orynbasary Altaı Kólginovke joldady, dep habarlaıdy “Adyrna” ulttyq portaly.
Ol óz saýalynda mádenıet salasy qyzmetkerleriniń jalaqysyn kóterý máselesi jaıly aıtty.
Rınat Zaıytovtyń aıtýynsha, búginde mádenıet qyzmetkerleri múlde eskerýsiz qalyp otyr.
«Memleketimizdiń ıdeologııasyn durys júrgizýde jáne otanymyzdy alys-jaqyn shetelderge tanystyrýda mádenıettiń atqaryp jatqan jumysy az emes. Respýblıkamyz boıynsha eleýli eńbek etip jatqan 56 teatr, 20 fılarmonııa, 267 murajaı, 3891 kitaphana bar. Ol az deseńiz Qazaqstan boıynsha qanshama mádenıet úıleri jáne taǵy sol sııaqty birneshe óner ujymdary da bar.
Ǵ. Músirepovtiń: «Adam – ónerdi qanshalyqty jaqsy kórse, sonshalyqty qorǵaýǵa mindetti» degen nasıhat sózi bar.
Ókinishke qaraı, biz búgingi kúnde memlekettiń aınasy bolyp otyrǵan mádenıet qyzmetkerlerin múldem eskerýsiz qaldyrýdamyz», - dep atap ótti ol.
Sonymen qatar, mádenıet salasynyń qyzmetkerleri qatarynda sahnada óner kórsetetin tulǵalar ǵana emes, solardyń jaǵdaıyn jasap otyrǵan sahna syrtyndaǵy eńbek adamdary da bar ekenine toqtaldy.
«Olar memleketine shynaıy mahabbatpen qarap, mádenıetke bar yqylasymen qyzmet etetin: sahna tehnıkteri, kostıýmerler, grımerler, jaryq túsirýshiler, dybystaýshy degen sııaqty myńdaǵan adamdar. Janǵa batatyn bir jaıt, bul atalǵan qyzmetkerler áli kúnge deıin sanaty joǵarylap, jalaqysy ósip jatqan ustazdar, dárigerler sııaqty mamandar qatarynan da oryn alǵan joq.
Qazirgi tańda qaı mekemeni alsańyz da mádenıet salasy qyzmetkerleriniń jalaqysy 60 myń teńgeden bastalyp, 100 myń teńgege jeter jetpes mejeden asa almaı tur. Eńbekaqynyń tómendigi bilikti mamandardyń jumystan óz erkimen ketip, mádenıet oshaqtarynyń jumysyn turalatýǵa ákelip soǵady.
Qurmetti Altaı Seıdiruly, osy oraıda, men Qazaqstan Respýblıkasy Úkimetiniń «Azamattyq qyzmetshilerge, memlekettik bıýdjet qarajaty esebinen ustalatyn uıymdardyń qyzmetkerlerine, qazynalyq kásiporyndardyń qyzmetkerlerine eńbekaqy tóleý júıesi týraly» 2015 jylǵy 31 jeltoqsandaǵy № 1193 qaýlysynyń qosymshasyna mádenıet, arhıv jáne kitaphana qyzmetkerleriniń koefıentterin ózgertip, jalaqylaryn ósirýlerińizdi suraımyn.
Qurmetti Altaı Seıdiruly, Siz Áleýmettik-mádenı damý komıtetiniń otyrysynda birlesip jumys jasaýǵa ýáde bergen edińiz jáne de qaıta jasaqtalǵan mınıstrler kabıneti «AMANAT» partııasynyń saılaýaldy baǵdarlamasyn tolyqtaı iske asyrýǵa eńbektenetinin habarlaǵansyz.
Sol sebepti meniń saýalym oń sheshimin tabady dep senemin», - dep túıindedi Rınat Zaıytov.
