ءماجىلىستىڭ جالپى وتىرىسىندا دەپۋتات داۋلەت مۇقاەۆ كوپبالالى وتباسىلار تار ۇيدە تۇرۋعا ءماجبۇر ەكەنىن، مەملەكەتتىك باعدارلامالاردىڭ تالابىن قايتا قاراۋ كەرەكتىگىن ايتتى، دەپ حابارلايدى "ادىرنا" ۇلتتىق پورتالى.
ول دەپۋتاتتىق ساۋالىن پرەمەر-ءمينيستردىڭ ءبىرىنشى ورىنباسارى رومان سكليارعا جولدادى.
«حالقىمىزدىڭ «ۇلى دالا كۆارتيرانتتارى» اتانعانى دا جانعا قاتتى باتادى. ءۇيسىز-كۇيسىز جۇرگەن قازاقستاندىقتاردى قولجەتىمدى جانە ساپالى باسپانامەن قامتاماسىز ەتەتىن مەملەكەتتىك باعدارلامالار قولجەتىمدى بولماي تۇر. بۇگىندە تۇرعىن ءۇي باعىتىنداعى مەملەكەتتىك باعدارلامالار حالىقتىڭ سۇرانىسىن قاناعاتتاندىرماي وتىر»، - دەدى دەپۋتات.
ونىڭ پايىمداۋىنشا، «نۇرلى جەر» باعدارلاماسى اياسىنداعى «باقىتتى وتباسى» جانە «شاڭىراق» باعدارلامالارىنىڭ تالاپتارىنا وزگەرىس ەنگىزۋ كەرەك.
«باقىتتى وتباسى» باعدارلاماسى قازاقستاندا 2019 جىلدان بەرى جۇزەگە اسىرىلىپ كەلەدى. جىل سايىن بيۋدجەتتەن 50 ملرد تەڭگە توڭىرەگىندە اقشا اۋدارىلىپ، 8 مىڭعا جۋىق وتباسى ءۇيلى بولدى. باعدارلاما اياسىندا ماكسيمالدى نەسيەلەۋ سوماسى ايماقتار بويىنشا (الماتى، استانا، شىمكەنت، اتىراۋ، اقتاۋ) ماكسيمالدى سوما 15 ملن تەڭگەگە تەڭ ەدى. 2019-2020 جىلدارى بۇل اقشاعا 2 بولمەلى ءۇي الۋعا مۇمكىندىك بولسا، قازىر پاتەر باعاسى وسكەننەن تەك 1 بولمەلى ءۇي الۋعا ءماجبۇر»، - دەدى داۋلەت مۇقاەۆ.
سوزىنشە، قازاقستاندىقتار «7-20-25» باعدارلاماسى بويىنشا باسپانا الۋ ءۇشىن بانكتەردىڭ الىندا تۇنەپ جاتىر.
باعدارلاما ۇيىمداستىرۋشىلارى «اقشا بار، ءبارى جاقسى، باعدارلاما جۇمىس ىستەپ تۇر» دەپ كورسەتەدى. قازىر «7-20-25» باعدارلاماسى بويىنشا قازاقستاندا بىردە-ءبىر بانك يپوتەكا بەرمەيدى؟ سەبەبى ماۋسىم سايىن ليميت قويىپ قويعان. حالىق بانكتەردىڭ الدىندا تۇنەۋگە ءماجبۇر. بۇل تۇرعىدا «7-20-25» باعدارلاماسى بويىنشا ءليميتتى الىپ تاستاۋ كەرەك. باعدارلاما 2029 جىلعا دەيىن سوزىلادى. دەگەنمەن وعان دەيىن اتى بار دا زاتى جوق باعدارلاماعا اينالۋى ابدەن مۇمكىن. مىڭداعان ادام بانكتەن ماقۇلداۋ العانىمەن، ليميت كەسىرىنەن ءۇيدىڭ كىلتىن الا الماي ءجۇر، - دەيدى ول.
