Májilistiń jalpy otyrysynda depýtat Dáýlet Muqaev kópbalaly otbasylar tar úıde turýǵa májbúr ekenin, memlekettik baǵdarlamalardyń talabyn qaıta qaraý kerektigin aıtty, dep habarlaıdy "Adyrna" ulttyq portaly.
Ol depýtattyq saýalyn Premer-mınıstrdiń birinshi orynbasary Roman Sklıarǵa joldady.
«Halqymyzdyń «Uly dala kvartıranttary» atanǵany da janǵa qatty batady. Úısiz-kúısiz júrgen qazaqstandyqtardy qoljetimdi jáne sapaly baspanamen qamtamasyz etetin memlekettik baǵdarlamalar qoljetimdi bolmaı tur. Búginde turǵyn úı baǵytyndaǵy memlekettik baǵdarlamalar halyqtyń suranysyn qanaǵattandyrmaı otyr», - dedi depýtat.
Onyń paıymdaýynsha, «Nurly jer» baǵdarlamasy aıasyndaǵy «Baqytty otbasy» jáne «Shańyraq» baǵdarlamalarynyń talaptaryna ózgeris engizý kerek.
«Baqytty otbasy» baǵdarlamasy Qazaqstanda 2019 jyldan beri júzege asyrylyp keledi. Jyl saıyn bıýdjetten 50 mlrd teńge tóńireginde aqsha aýdarylyp, 8 myńǵa jýyq otbasy úıli boldy. Baǵdarlama aıasynda maksımaldy nesıeleý somasy aımaqtar boıynsha (Almaty, Astana, Shymkent, Atyraý, Aqtaý) maksımaldy soma 15 mln teńgege teń edi. 2019-2020 jyldary bul aqshaǵa 2 bólmeli úı alýǵa múmkindik bolsa, qazir páter baǵasy óskennen tek 1 bólmeli úı alýǵa májbúr», - dedi Dáýlet Muqaev.
Sózinshe, qazaqstandyqtar «7-20-25» baǵdarlamasy boıynsha baspana alý úshin bankterdiń alynda túnep jatyr.
Baǵdarlama uıymdastyrýshylary «aqsha bar, bári jaqsy, baǵdarlama jumys istep tur» dep kórsetedi. Qazir «7-20-25» baǵdarlamasy boıynsha Qazaqstanda birde-bir bank ıpoteka bermeıdi? Sebebi maýsym saıyn lımıt qoıyp qoıǵan. Halyq bankterdiń aldynda túneýge májbúr. Bul turǵyda «7-20-25» baǵdarlamasy boıynsha lımıtti alyp tastaý kerek. Baǵdarlama 2029 jylǵa deıin sozylady. Degenmen oǵan deıin aty bar da zaty joq baǵdarlamaǵa aınalýy ábden múmkin. Myńdaǵan adam bankten maquldaý alǵanymen, lımıt kesirinen úıdiń kiltin ala almaı júr, - deıdi ol.
