شۆەيتساريانىڭ بەرن كانتونىندا (ايماق) 2 جولاۋشىلار پويىزىنىڭ ۆاگوندارى ءبىر ۋاقىتتا رەلستەن شىعىپ كەتتى. سالدارىنان 12 ادام زارداپ شەكتى، دەپ حابارلايدى "ادىرنا" ۇلتتىق پورتالى 20 Minuten-گە سىلتەمە جاساپ.
تەمىرجولداعى قاتار كەلگەن قوس اپاتتان 12 ادام زارداپ شەكتى، ونىڭ ۇشەۋى – بالا. 40 ادامعا كومەك كورسەتىلدى. وقيعا ورنىنا دەرەۋ ءورت سوندىرۋشىلەر مەن جەدەل جاردەم جەتكەن. جاراقاتتانعان جولاۋشىلار اۋرۋحاناعا جاتقىزىلدى. ءبىر جولاۋشى اۋىر حالدە جاتىر دەپ حابارلاندى. قوس اپاتتىڭ اراسى 15 كيلومەتردى قۇرايدى.
تەمىرجول وپەراتورىنىڭ مالىمدەۋىنشە، اپاتقا كۇشتى جەل سەبەپ بولۋى مۇمكىن. وقيعا بولعان ساتتە جاقىن ماڭداعى ستانتسيا جەل ەكپىنىنىڭ ساعاتىنا 136 كم كورسەتكىشپەن ۇيىتقىعانىن تىركەگەن.
"ادىرنا" ۇلتتىق پورتالى
