قازاقستان اۋعانستان اۋماعىندا سالىناتىن تۇرعۇندي – گەرات تەمىرجولىنىڭ قارجىلاندىرۋ قۇرىلىمىن پىسىقتادى، دەپ حابارلايدى "ادىرنا" ۇلتتىق پورتالى.
بۇل تۋرالى ۆيتسە-ءمينيسترى ماقسات قالياقپاروۆ ۇكىمەت وتىرىسىندا مالىمدەدى.
ونىڭ ايتۋىنشا، ۇزىندىعى 120 شاقىرىم بولاتىن جوبا 2026–2027 جىلدارى جۇزەگە اسىرىلماق. قازىر قارجىلاندىرۋ تەتىكتەرى ناقتىلانىپ، ينۆەستيتسيا تارتۋ باعىتىندا جۇمىس ءجۇرىپ جاتىر.
«تەمىرجول جەلىسىن ىسكە قوسۋ قازاقستاننان اۋعانستانعا جۇك ەكسپورتتاۋ مەن ترانزيتتىك تاسىمالدى ارتتىرۋعا مۇمكىندىك بەرەدى. سونىمەن قاتار، جوبا ارقىلى پاكىستان مەن ءۇندىستان نارىقتارىنا شىعۋ كوزدەلگەن»، — دەدى قالياقپاروۆ.
ەسكە سالا كەتسەك، شىلدە ايىندا قازاقستان پرەمەر-ءمينيسترى ولجاس بەكتەنوۆ XVII ەكونوميكالىق ىنتىماقتاستىق ۇيىمىنىڭ ءسامميتى اياسىندا اۋعانستان ۇكىمەتىنىڭ وكىلدەرىمەن كەزدەسۋ بارىسىندا جوبانى قارجىلاندىرۋعا دايىن ەكەنىن مالىمدەگەن ەدى. كەيىن «باحتار» مەملەكەتتىك اگەنتتىگى قازاقستان تەمىرجول قۇرىلىسىنا 500 ملن دوللار ينۆەستيتسيا سالاتىنىن حابارلادى.
بۇل اقپاراتتى تامىز ايىندا ۆيتسە-پرەمەر، ۇلتتىق ەكونوميكا ءمينيسترى سەرىك جۇمانعارين دە راستاعان. ونىڭ ايتۋىنشا، اتالعان قاراجات جوبانىڭ العاشقى كەزەڭىنە بولىنەدى.
