شىعىس قازاقستاندا تەمىرجولدا تسەمەنت تيەلگەن بەس ۆاگون رەلستەن شىعىپ كەتتى، دەپ حابارلايدى “ادىرنا” ۇلتتىق پورتالى.
"قازاقستان تەمىر جولى" ۇلتتىق كومپانياسى ءباسپاسوز قىزمەتىنىڭ حابارلاۋىنشا، وقيعا 8 ءساۋىر كۇنى ساعات 10.35-تە التاي – كۇمىستاۋ تەمىرجول ۋچاسكەسىندە بولعان.
ءبىر ۆاگون "كۋزباسسترانستسەمەنت" جشق (رەسەي فەدەراتسياسى) مەنشىگى بولسا، قالعانى "كاسپي تسەمەنت" جشس-گە (قازاقستان رەسپۋبليكاسى) تيەسىلى. پويىز 28 كم/ساع باياۋ جىلدامدىقپەن جۇرگەن.
وقيعادان ەشكىم زارداپ شەكپەدى. جولاۋشىلار جانە جۇك پويىزدارىنىڭ قوزعالىسى توقتامامدى.
قازىرگى ۋاقىتتا قالپىنا كەلتىرۋ جۇمىستارى جۇرگىزىلىپ جاتىر. ۆاگونداردىڭ رەلستەن شىعۋ سەبەپتەرى انىقتالادى.
ەسكە سالا كەتەيىك، وسىعان ۇقساس وقيعا ءبىر اپتادان از ۋاقىت بۇرىن ءدال وسى وڭىردە بولعان ەدى: 3 ساۋىردە سەرەبريانسك قالاسىنىڭ اۋماعىندا ەرتىس ارقىلى وتەتىن تەمىرجول كوپىرىنە كىرەبەرىستە بىردەن 18 ۆاگون اۋدارىلىپ، ونىڭ التاۋى سۋعا قۇلادى. ۆاگوندار مىس-مىرىش رۋداسىن جانە شلاكتاردى تاسىمالداعان.
سونداي-اق ءبىر اي بۇرىن، 28 اقپاندا كۋرچاتوۆ قالاسىنداعى دەگەلەڭ ستانساسىندا جۇك پويىزىنىڭ ۆاگوندارى اۋدارىلىپ كەتتى.
“ادىرنا” ۇلتتىق پورتالى
