اقتاۋ قالاسىندا تەڭىز جاعالاۋىن زاڭسىز جايلاعان كاسىپكەرلەردىڭ نىساندارى نازارعا ىلىكتى. قارت كاسپيدىڭ جاعاسىنداعى ءموبيلدى پاۆيلوندار مەن بالالار ەلەكتروموبيلدەرى الىنىپ جاتىر، دەپ حابارلايدى "ادىرنا" ۇلتتىق پورتالى.
اكىمدىك قىزمەتكەرلەرى مەن كوممۋنالدىق مەكەمەلەر بىرلەسىپ، 9 ا، 14 ا جانە 15 ا شاعىن اۋداندارى تۇسىنداعى بالالارعا ارنالعان باتۋتتار مەن ۆەلوسيپەد، ويىن ماشينالارى سياقتى قوزعالىس قۇرالدارىن الىپ تاستاۋ جۇمىستارىن باستادى.
«ءبىز بىرنەشە رەت زاڭسىز پاۆيلونداردى الىپ تاستاۋ، سونداي-اق بالالار وينايتىن اتتراكتسيونداردى جاعالاۋدان شىعارۋ تۋرالى جازباشا ەسكەرتۋلەر بەردىك. الايدا، كاسىپكەرلەر زاڭعا باعىنباي، جۇمىستارىن جالعاستىرا بەردى. قازىر زاڭ اياسىندا پاۆيلوندار مەن وزگە دە قۇرال-جابدىقتاردى الىپ تاستاۋ جۇمىستارى باستالدى. بۇل زاڭسىز ارەكەت جاعالاۋدىڭ كوركىن بۇزىپ قانا قويماي، قاۋىپسىزدىككە دە اسەر ەتەدى. ويتكەنى، بۇل كاسىپكەرلەر بالالاردىڭ قاۋىپسىزدىگىنە جاۋاپ بەرمەيدى»، - دەيدى اقتاۋ قالاسى اكىمىنىڭ ورىنباسارى ەربول جۇماعازين.
مامانداردىڭ ايتۋىنشا، بۇگىندە جاعالاۋدا شامامەن 35 كاسىپكەر زاڭسىز ءوز كاسىبىن دوڭگەلەتىپ وتىر. مەرەكە كەزىندە بۇل كورسەتكىش 55-كە جەتەدى.
«قالا تۇرعىندارى اراسىندا ساۋالناما جۇرگىزىلدى. ناتيجەسىندە حالىقتىڭ باسىم بولىگى تەڭىز جاعالاۋىنداعى كاسىپكەرلىككە قارسى ەكەنى انىقتالدى. بۇل ورىنداردا كاسىپ جۇرگىزىپ كەلگەن تۇلعالارعا ۇسىنىس رەتىندە «اقبوتا» ساياباعى مەن بۇرىن مەموراندۋم جاسالعان ساۋدا بازارلارىنىڭ اۋماعىنا كوشۋ ۇسىنىلدى»، - دەدى ە. جۇماعازين.
اكىمشىلىك قالا تۇرعىندارىنىڭ تالابىن ەسكەرىپ، كاسىپكەرلەرگە جاڭا اۋماققا كوشۋدى ۇسىنعانىن العا تارتتى.
"ادىرنا" ۇلتتىق پورتالى
