قازاقستانعا ءىرى كولەمدە ەسىرتكى تاسىمالداعان شەتەلدىكتەر ۇستالدى (ۆيدەو)

2970
Adyrna.kz Telegram

ۇلتتىق قاۋىپسىزدىك كوميتەتى ەسىرتكى كونترابانداسىنا قاتىسى بار حالىقارالىق ەسىرتكى سينديكاتىنىڭ جولىن كەستى، دەپ حابارلايدى «ادىرنا» ءتىلشىسى.

جەدەل تەكسەرۋ بارىسىندا شەتەلدىك ازاماتتاردىڭ قازاقستان اۋماعىنا تەڭىز جولىمەن وپياتتار مەن باسقا دا تىيىم سالىنعان زاتتاردى جەتكىزۋدىڭ تۇراقتى ارناسىن ۇيىمداستىرۋعا قاتىسى بارى بەلگىلى بولدى.

«كاسپي سۋ ايلاعى ارقىلى ەسىرتكىنى تاسىمالداۋ باعدارلارى مەن تاسىلدەرىن ەگجەي-تەگجەيلى ايقىندالدى. ەسىرتكى توبىنىڭ مۇشەلەرى ولاردى انىقتاۋدا قيىندىق تۋدىرعان قازىرگى زامانعى سپۋتنيكتىك ناۆيگاتسيا قۇرالدارىمەن جانە GPS-پەن جابدىقتالعان شاعىن جىلدام جۇرەتىن كەمەلەردى پايدالانعان»،—دەدى ۇقك-نىڭ ءباسپاسوز قىزمەتى.

26 ناۋرىزدا ماڭعىستاۋ وبلىسىندا وپەراتسيانىڭ اياقتالۋ كەزەڭىندە ۇقك مەن «ا» ارنايى بولىمشەسىنىڭ قىزمەتكەرلەرى ەسىرتكى ارناسىن ۇيىمداستىرۋشىنى جانە ونىڭ ءۇش كومەكشىسىن ۇستادى.

«كونترابانداشىلاردىڭ سۋ كولىگىن تەكسەرۋ كەزىندە 30 كگ-دان استام اپيىن جانە 10 قاپتاما «مەتادون» پسيحوتروپتىق زاتى تابىلدى. وسى ءىس بويىنشا ماتەريال ستبت-دا تىركەلدى، تەرگەۋ ءىس-شارالارى پروكۋراتۋرا ورگاندارىمەن ءوزارا ءىس-قيمىلدا جۇرگىزىلىپ جاتىر»،—دەپ تولىقتىردى كوميتەت.

پىكىرلەر