وڭىرارالىق ينۆەستيتسيالىق فورۋمدى جىل سايىن ءداستۇرلى تۇردە ۇيىمداستىراتىن بولامىز. بۇل تۋرالى شىمكەنت قالاسىنىڭ اكىمى م.ايتەنوۆ «SHYMKENT INVESTMENT - 2023» وڭىرارالىق ينۆەستيتسيالىق فورۋمىندا مالىمدەدى.
شىمكەنت قالاسى اكىمدىگىنىڭ ۇيىمداستىرۋىمەن «SHYMKENT INVESTMENT - 2023» وڭىرارالىق ينۆەستيتسيالىق فورۋمى باستالدى. مۇندا ەلىمىزدىڭ وڭتۇستىك وڭىرلەرىنىڭ — تۇركىستان، قىزىلوردا، جامبىل وبلىستارى مەن شىمكەنت قالاسىنا ينۆەستيتسيالىق ءتۇسىمدى ارتتىرۋ، ەكونوميكالىق تۇرعىدا دامىتۋ مەن ءوزارا ىنتىماقتاستىقتى نىعايتۋ ماسەلەلەرى تالقىلانباق.
— بۇگىن ۇلىستىڭ ۇلى كۇنى قارساڭىندا وڭتۇستىك وڭىردەگى ارىپتەستەرىمىزدىڭ باسىن قوسىپ، اۋقىمدى ءىس باستاپ وتىرمىز. بۇگىنگى ينۆەستيتسيالىق فورۋم قىزىلوردا، تۇركىستان، جامبىل وبلىستارى مەن شىمكەنت قالاسىنىڭ ەكونوميكالىق تۇرعىدا دامىپ، ءوزارا ىنتىماقتاستىقتا اۋقىمدى جوبالاردى جۇزەگە اسىرۋعا مۇمكىندىك بەرمەك. فورۋم اياسىندا كۇنى كەشە وڭىرلەردەگى ءوندىرۋشى كاسىپورىندار اراسىندا كورمە-جارمەڭكە ءوتتى. وندا ءبىز شەكارالاس وڭىرلەردىڭ مۇمكىندىكتەرىمەن تانىستىق. سونىمەن قاتار، فورۋمعا شەتەلدىك ينۆەستورلار مەن كاسىپكەرلەر دە قاتىسىپ وتىر. كەزدەسۋلەر بارىسىندا كاسىپكەرلەرىمىز تاجىريبە الماسىپ، جاڭا جوبالاردى جۇزەگە اسىرۋدىڭ وڭتايلى ءادىس-تاسىلدەرىن قاراستىرادى دەپ سەنەمىز. شىمكەنتتە بۇگىندە 5 يندۋستريالدى ايماق 867 گەكتار اۋماقتى الىپ جاتىر. وندا 350-گە جۋىق جوبا جۇزەگە اسىرىلىپ، بۇگىندە يندۋستريالدى ايماقتاردىڭ تولىمدىلىعى 90 پايىزدان استى. سوندىقتان جالپى اۋدانى 860 گەكتاردى قۇرايتىن تاعى 5 يندۋستريالدى ايماق سالىنىپ جاتىر، - دەدى شىمكەنت قالاسىنىڭ اكىمى مۇرات دۇيسەنبەكۇلى.
وڭتۇستىك وڭىرلەردىڭ باسىن قوسقان القالى جيىنعا قر سىرتقى ىستەر ۆيتسە-مينيستر ا.ايداروۆ، قازاقستاننىڭ وزبەكستان رەسپۋبليكاسىنداعى توتەنشە جانە وكىلەتتى ەلشىسى ب.اتامقۇلوۆ، قازاقستاننىڭ قىرعىزستانداعى توتەنشە جانە وكىلەتتى ەلشىسى ر.جوشىباەۆ جانە شەتەلدىك الەۋەتتى ينۆەستورلار، وتاندىق بيزنەس-قاۋىمداستىق وكىلدەرى، ورتالىق مەملەكەتتىك ورگاندار، ۇلتتىق كومپانيالار، قارجى ينستيتۋتتارى قاتىسىپ وتىر. ال، فورۋمنىڭ ارنايى قوناعى رەتىندە حالىقارالىق «Fitch Ratings» ساراپشىلىق كومپانياسىنىڭ وكىلى شاقىرىلعان.
— بۇگىنگى فورۋمنىڭ باستى ەرەكشەلىگى — وڭتۇستىك وڭىردەگى قىزىلوردا، تۇركىستان، جامبىل وبلىستارى مەن شىمكەنت قالاسىنىڭ بىرلەسىپ وتكىزىپ وتىرعان العاشقى وڭىرارالىق ينۆەستيتسيالىق فورۋمى. ۇلىستىڭ ءۇلى كۇنى قارساڭىندا وسى 4 ءوڭىردىڭ كاسىپكەرلەرىنىڭ باسىن قوسىپ، اتقارۋشى ورگان وكىلدەرىن شاقىرىپ، اۋقىمدى ينۆەستيتسيالىق جوبالاردى تالقىلاپ وتىرمىز. ياعني، شىمكەنت قالاسىنىڭ عانا ەمەس، وڭتۇستىك ءوڭىردىڭ مۇمكىندىكتەرىن شەتەلدىك، وتاندىق ينۆەستورلارعا كەڭىنەن تانىستىرۋ كوزدەلگەن. مەملەكەت جانە جەرگىلىكتى اكىمدىكتەر تاراپىنان كورسەتىلەتىن قولداۋلار دا وسى فورۋم اياسىندا ايتىلادى. فورۋمعا ءۇندىستان، قىتاي، تۇركيا، رەسەي ەلىنەن ينۆەستورلار قاتىسىپ، قىزىعۋشىلىعىن ءبىلدىرىپ وتىر. وسى جيىن بارىسىندا جالپى قۇنى 364 ميلليارد تەڭگەنى قۇرايتىن 14 جوبا بويىنشا مەموراندۋمعا قول قويىلماق، - دەيدى شىمكەنت قالالىق كاسىپكەرلىك جانە يندۋستريالدى-يننوۆاتسيالىق دامۋ باسقارماسىنىڭ باسشىسى بەرەكە دۇيسەبەكوۆ.
شىمكەنت — توعىز جولدىڭ تورابىنداعى قالا. تەمىر جول تاسىمالىنا دا، باتىس قىتاي-باتىس ەۋروپا ءدالىزى ارقىلى تاسىمالعا دا قولايلى ورتادا. ب.دۇيسەبەكتوۆتىڭ ايتۋىنشا، وسى ەرەكشەلىكتەردى ەسكەرە وتىرىپ، شىمكەنتتەگى لوگيستيكالىق ايماقتىڭ اۋماعىن 136 گەكتارعا كەڭەيتىلىپ جاتىر.
شىمكەنتتىڭ ەكونوميكالىق دامۋىنا ۇلەس قوسىپ وتىرعان وزبەكستاندىق ينۆەستور ساركور يسونباەۆ اتقارىلىپ جاتقان جۇمىس بارىسىنا توقتالدى.
— ءبىز شىمكەنتتە فارماتسەۆتيكا سالاسىن دامىتۋ ماقساتىندا قارجى سالىپ وتىرمىز. بۇل قادام ەكى ەل اراسىنداعى ەكونوميكالىق قاتىناستى عانا ەمەس، ىنتىماقتاستىقتى دا نىعايتا تۇسەدى دەگەن سەنىمدەمىز. شامامەن 3-4 جىل بۇرىن «تاسساي» يندۋستريالدى ايماعىندا جاقپا ماز، سۋپپوزيتور دارمەكتەر ءوندىرىسىنىڭ قۇرىلىسىن باستاعان بولاتىنبىز. وعان 3,5 ميلليون دوللار قارجى جۇمسالىپ، ءوندىرىس جۇمىسىن باستاپ وتىر.بۇل — العاشقى كەزەڭ. ال، بيىل 9,7 ميلليون دوللارعا ينفۋزيالىق ەرىتىندى ءوندىرىسىنىڭ قۇرىلىسىن باستاماقپىز، - دەيدى «Dentafill-قازاقستان» فارماتسەۆتيكالىق كومپانياسىنىڭ باس ديرەكتورى س.يسونباەۆ.
ايتا كەتەيىك، شىمكەنت قالاسى رەسپۋبليكالىق ماڭىزى بار قالا اتانعان ءتۇستا 194 ملرد تەڭگە ينۆەستيتسيا تارتىلسا، بىلتىر ينۆەستيتسيا كولەمى 560 ملرد تەڭگەنى قۇراعان. ماماندار جىل سوڭىنا دەيىن 750 ملرد تەڭگە ينۆەستيتسيا تارتۋدى جوسپارلاپ وتىر.
