قمدب توراعاسى، باس ءمۇفتي ناۋرىزباي قاجى تاعانۇلى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا حالىقتىڭ، اسىرەسە جاستاردىڭ پاتريوتتىق سەزىمىن وياتۋ ماقساتىندا اتقارىلاتىن جوبالار تۋرالى باياندادى. بۇل تۋرالى informburo.kz حابارلادى، دەپ جازادى "ادىرنا" ۇلتتىق پورتالى.
"حالىقتى وياتقىڭ كەلسە، ونىڭ تاريحىن ويات" دەگەن ءسوزدىڭ ءمانى تەرەڭدە. مەدرەسە-كوللەدجدەردىڭ وقۋ باعدارلاماسىنا فاكۋلتاتيۆ ءدارىس رەتىندە "الاشتانۋ", "تۇلعاتانۋ" ءپانىن ەنگىزۋ تۋرالى باستاما كوتەرىپ وتىرمىز. ماقساتىمىز – بولاشاق ءدىن ماماندارىن ۇلتجاندىلىق پەن وتانسۇيگىشتىككە باۋلۋ", – دەدى باس ءمۇفتي.
ونىڭ ايتۋىنشا، ءداستۇرلى يسلامدى قوعامدا كەڭىنەن دارىپتەپ كەلە جاتقان بىردەن-ءبىر ءدىني بىرلەستىك – قازاقستان مۇسىلماندارى ءدىني باسقارماسى. قمدب 2023 جىلدى ءدىني قىزمەت اياسىندا "يسلام جانە ىزگى قوعام" جىلى دەپ جاريالاپ، كونفەرەنتسيالار مەن سەمينارلار وتكىزۋدى باستاپ كەتتى.
"كوپ عاسىردان بەرى اللاعا سەنگەن مۇسىلمان ەلمىز. قولىمىزدان كەلگەنشە بابالار ۇستانعان جولدى ساقتاپ، ونى كەڭىنەن جاستارىمىزعا ناسيحاتتايىق. ءبىزدىڭ اتا-بابالارىمىزدىڭ سالت-ءداستۇرى – تۇنىپ تۇرعان يسلام ءدىنى. ونى كەڭىنەن حالقىمىزعا ۇيرەتسەك نۇر ۇستىنە نۇر بولار ەدى. قازىرگى تاڭدا يسلام ءدىنىن جامىلعان نەشە ءتۇرلى اعىمدار بار. سولاردان ساقتانىپ، بابالار جولىن ۇستانايىق", – دەدى ناۋرىزباي قاجى تاعانۇلى.
"ادىرنا" ۇلتتىق پورتالى
