اڭداماي سويلەگەن اۋىرماي ولەر. رەسپۋبليكا پارتياسىنا ءىشتارتىپ ءجۇر ەدىم. جاسى الپىستان اسقانداردى كارى يتكە تەڭەگەندەرى نە سۇمدىق؟!
«حابار» تەلەارناسىنداعى دەباتتى قازاقستان حالقىنىڭ مادەنيەتىمەن تەڭەستىرگەنى قاي ساسقانى؟
ول دەباتتى ءبارىمىز كوردىك. بىراق ءدال سوعان بولا حالىقتى «مادەنيەتسىز» دەپ سوگۋ ەشكىمنىڭ ويىنا كىرىپ-شىقپاپتى.
بىلسەڭىز، ول دەباتتىڭ شارتى سولاي بولعان: التى سپيكەر ءبىر ادامنىڭ ءسوزىن بولۋگە رۇقسات الدى. ەگەر ۇناماسا، وندا ارىزىڭىزدى ۇيىمداستىرۋشىلارعا ايتۋىڭىز كەرەك ەدى! بىراق تۇتاس حالىقتىڭ، ۇلتتىڭ مادەنيەتىنە تيىسپەڭىز!
ايتپاقشى، ايداربەك مىرزانىڭ جەكە باس مادەنيەتىنىڭ دەڭگەيىن مىنا سوزىنەن-اق اڭعارۋعا بولادى: «وچەن ۆاجنو بىت ەنەرگيچنىمي. دولجنى بىت نوۆىە ليۋدي، س نوۆىمي پودحودامي. ستارۋيۋ سوباكۋ نوۆىم تريۋكام نە ناۋچيش». بۇل – ونىڭ «قاتارلارىڭىزعا اقساقالداردى الۋ كەرەك ەمەس پە؟» دەگەن قاراپايىم كورەرمەننىڭ سۇراعىنا بەرگەن جاۋابى. ول بۇل سۇراققا «ءبىزدىڭ پارتيانىڭ اقساقالى – مەنمىن، 7000 ادامدى باسقارىپ وتىرمىن، ال ءبىزدىڭ پارتيانىڭ ورتا جاسى – 37» دەپ مەنمەنسي جاۋاپ بەردى. ودان ءارى «1990 جىل مەن 2005 جىلدار ارالىعىندا تۋعانداردى ساناساق، 5 ميلليون ادام ەكەن، ال جاسى 60-تان اسقانداردى ساناساق، 1,5 ميلليون ادام ەكەن... بىزگە جاڭا ادامدار كەرەك. كارى ءيتتى جاڭا نارسەگە ۇيرەتە المايسىڭ» دەدى. سوندا جاسى 60-تان اسقانداردى تىكەلەي ايتقاندا «كارى يت» دەپ تۇر عوي؟
قىسقا قايىرعاندا، ول جانە ونىڭ پارتيالاستارى ادام ەكەن جانە «جاڭا ادامدار» ەكەن دە، قالعانىمىز – يت ەكەنبىز. اسىرەسە، جاسى 60-تان اسىپ كەتكەندەر...
تەلەديداردان ءدۇيىم ەل بەتىنە قاراپ وتىرعاندا بەت-اۋزى بۇلك ەتپەستەن، تۋعان حالقىن «مادەنيەتسىز»، ال وزىنەن جاسى ۇلكەندەردى «كارى يتكە» تەڭەگەن ساياساتكەرسىماقتان نە كۇتۋگە بولادى؟
ۇلكەندى سىيلاماعاننان بەز!
