Ańdamaı sóılegen aýyrmaı óler. Respýblıka partııasyna ishtartyp júr edim. Jasy alpystan asqandardy kári ıtke teńegenderi ne sumdyq?!
«Habar» telearnasyndaǵy debatty Qazaqstan halqynyń mádenıetimen teńestirgeni qaı sasqany?
Ol debatty bárimiz kórdik. Biraq dál soǵan bola halyqty «mádenıetsiz» dep sógý eshkimniń oıyna kirip-shyqpapty.
Bilseńiz, ol debattyń sharty solaı bolǵan: alty spıker bir adamnyń sózin bólýge ruqsat aldy. Eger unamasa, onda aryzyńyzdy uıymdastyrýshylarǵa aıtýyńyz kerek edi! Biraq tutas halyqtyń, ulttyń mádenıetine tıispeńiz!
Aıtpaqshy, Aıdarbek myrzanyń jeke bas mádenıetiniń deńgeıin myna sózinen-aq ańǵarýǵa bolady: «Ochen vajno byt energıchnymı. Doljny byt novye lıýdı, s novymı podhodamı. Starýıý sobaký novym trıýkam ne naýchısh». Bul – onyń «Qatarlaryńyzǵa aqsaqaldardy alý kerek emes pe?» degen qarapaıym kórermenniń suraǵyna bergen jaýaby. Ol bul suraqqa «Bizdiń partııanyń aqsaqaly – menmin, 7000 adamdy basqaryp otyrmyn, al bizdiń partııanyń orta jasy – 37» dep menmensı jaýap berdi. Odan ári «1990 jyl men 2005 jyldar aralyǵynda týǵandardy sanasaq, 5 mıllıon adam eken, al jasy 60-tan asqandardy sanasaq, 1,5 mıllıon adam eken... Bizge jańa adamdar kerek. Kári ıtti jańa nársege úırete almaısyń» dedi. Sonda jasy 60-tan asqandardy tikeleı aıtqanda «kári ıt» dep tur ǵoı?
Qysqa qaıyrǵanda, ol jáne onyń partııalastary adam eken jáne «jańa adamdar» eken de, qalǵanymyz – ıt ekenbiz. Ásirese, jasy 60-tan asyp ketkender...
Teledıdardan dúıim el betine qarap otyrǵanda bet-aýzy búlk etpesten, týǵan halqyn «mádenıetsiz», al ózinen jasy úlkenderdi «kári ıtke» teńegen saıasatkersymaqtan ne kútýge bolady?
Úlkendi syılamaǵannan bez!
