جۇرت الدىنداعى جاقسى اتىڭ مەن بەدەلىڭدى ابايسىز ايتىلعان ءبىر ءسوز قۇنسىزداندىرىپ جىبەرەتىن جاي بولادى. قازاقتا مۇنى "قاسىقتاپ جيناعان ابىرويدى شەلەكتەپ توگۋ" دەيدى. كەشەگى دەباتتا سونداي جاعداي بولدى.
شىنى كەرەك، قوعام جاڭالىق كۇتۋدە. ونى ەرتەڭگى سايلاۋمەن بايلانىستىرۋشىلار دا بار. جانە جاڭالىقتى ساياساتتاعى بەت-ءجۇزى جاڭا ادامدار جاسايدى دەپ جورامال جاساۋشىلار رەسپۋبليكا پارتياسىنا ەلەڭدەپ جۇرگەن. بۇعان ونىڭ باسشىلارىنىڭ جاس ەكەندىكتەرى دە اسەر ەتكەن بولۋى كەرەك. قانشا دەگەنمەن، ماعجان اقىننىڭ: "مەن جاستارعا سەنەمىن" دەگەنىندە ءمان بار عوي.
دەگەنمەن، ساياساتقا كەلگەن جاڭا پارتيانىڭ مۇشەلەرىنە سەنۋگە بولمايدى ەكەن. ونى كەشە وتكەن دەباتتا باسشىسى ايداربەك قوجانازاروۆتىڭ سوزىنەن اڭداۋعا بولادى. تىكسىنىپ قالدىم.
بىرىنشىدەن، ول ءوزىن اسىرا باعالاپ، باسقالاردان بيىك قوياتىن جىگىت ەكەن. مادەنيەت تۋرالى ايتام دەپ، العاشقى دەباتقا قاتىسقان پارتيالاردىڭ ءبارىن مادەنيەتسىز دەگەن تۇجىرىمدى جاساپ-اق تاستادى. ەكىنشىدەن، ول وزدەرىنىڭ جاستاردان باسقا ساناتتى مەنسىنبەيتىنىن كورسەتتى. جانە كەلتىرگەن مىسالىن ايتسايشى: "ستارۋيۋ سوباكۋ نوۆىم تريۋكام نە ناۋچيش". سونىمەن، 60-تان اسقاندار، اڭدادىڭدار ما، ءبىز ەشتەڭەگە جارامسىز، مويىنداعى قامىت ەكەنبىز...
ءارى قاراي ءسوزىمدى ءراسۋا ەتكىم كەلمەيدى. ۇلتتىق مادەنيەتتەن، قازاقتىڭ اۋىز ادەبيەتىنەن حابارى جوق "جاڭا ادامدارعا" حالقىمىزدىڭ "الپىسقا كەلگەننەن اقىل سۇرا" دەگەن ەرتەگىسىن وقۋعا كەڭەس بەرەم.
P.S. بۇلارعا داۋىس بەرەتىن، بىراق ولارعا سۇيكىمسىز ساناتتىڭ قاتارىنداعىلار وزدەرىن نە كۇتىپ تۇرعانىن تۇسىنەتىن بولار دەپ ويلايمىن...
