اتىراۋ وبلىسىنىڭ مامانداندىرىلعان اۋدانارالىق اكىمشىلىك سوتى قاشاعان كەن ورنىن يگەرۋشى NCOC كومپانياسىنىڭ 2,3 ترلن تەڭگە كولەمىندەگى ايىپپۇلدى ءوندىرىپ الۋعا بايلانىستى اتقارۋشىلىق ءىس جۇرگىزۋدى توقتاتۋ تۋرالى تالابىن قاناعاتتاندىرمادى. سوت شەشىمى 2026 جىلعى 23 قىركۇيەكتە قابىلدانعان، دەپ حابارلايدى "ادىرنا".
كومپانيا سوتتان مەملەكەتتىك سوت ورىنداۋشىسىنىڭ اتقارۋشىلىق ءىس جۇرگىزۋدى باستاۋ تۋرالى 21 شىلدەدەگى قاۋلىسىن، سونداي-اق جىلجىمايتىن مۇلىك پەن كولىك قۇرالدارىنا تىيىم سالۋ جونىندەگى قاۋلىلاردى زاڭسىز دەپ تانۋدى سۇراعان. بۇدان بولەك، NCOC 23 جانە 30 شىلدەدە بەلگىلى ءبىر ارەكەتتەردى جاساۋعا ەنگىزىلگەن شەكتەۋلەردىڭ كۇشىن جويۋدى تالاپ ەتتى.
الايدا سوت كومپانيانىڭ اتالعان تالاپتارىنىڭ بارلىعىن قاناعاتتاندىرۋدان باس تارتتى. سوت اكتىسىنە تۇپكىلىكتى نىساندا شىعارىلعان كۇننەن باستاپ 10 جۇمىس كۇنى ىشىندە اپەللياتسيالىق تارتىپپەن شاعىم بەرۋگە بولادى.
2,3 ترلن تەڭگە كولەمىندەگى تالاپتى قازاقستاننىڭ ەكولوگيا جانە تابيعي رەسۋرستار مينيسترلىگى 2023 جىلى ەنگىزگەن. بۇعان قاشاعان كەن ورنىندا كۇكىرتتى بەلگىلەنگەن مولشەردەن ارتىق ساقتاۋ فاكتىلەرى نەگىز بولعان.
NCOC كومپانياسى ايىپپۇلمەن كەلىسپەيتىنىن ايتىپ، حالىقارالىق تورەلىك راسىمدەرگە جۇگىنگەن. ال قازاقستان تاراپى سوت شەشىمىنىڭ زاڭدى كۇشىنە ەنگەنىن جانە ونى ورىنداۋ مىندەتتى ەكەنىن مالىمدەگەن.
اتقارۋشىلىق ءىس جۇرگىزۋ باستالعاننان كەيىن اتىراۋ وبلىسى بويىنشا ەكولوگيا دەپارتامەنتىنىڭ باسشىسى اسقار ءجۇسىپوۆ ءوندىرىپ الۋ جونىندەگى اتقارۋشىلىق قۇجاتتى ورىنداۋ مەرزىمى ەكى اي ەكەنىن ايتقان.
الايدا 7 قىركۇيەكتە 2,3 ترلن تەڭگەنى ءوندىرىپ الۋعا قاتىستى اتقارۋشىلىق ءىس ۋاقىتشا توقتاتىلعانى بەلگىلى بولدى. بۇل اقپارات اتقارۋشىلىق ءىس جۇرگىزۋ ورگاندارىنىڭ اۆتوماتتاندىرىلعان اقپاراتتىق جۇيەسىندە كورسەتىلگەن.
ادىلەت مينيسترلىگى اتقارۋشىلىق ءىس جۇرگىزۋدىڭ ۋاقىتشا توقتاتىلۋىن NCOC كومپانياسىنىڭ مەملەكەتتىك سوت ورىنداۋشىسىنىڭ ارەكەتتەرىنە شاعىم تۇسىرۋىمەن بايلانىستىردى. وسىعان بايلانىستى اتىراۋ وبلىسىنىڭ مامانداندىرىلعان اۋدانارالىق اكىمشىلىك سوتى اتقارۋشىلىق ءىس جۇرگىزۋ ماتەريالدارىن سۇراتقان.
ەندى سوتتىڭ 23 قىركۇيەكتەگى شەشىمى اپەللياتسيالىق تارتىپپەن قايتا قارالۋى مۇمكىن.
