19 ناۋرىز كۇنى ەلىمىز ءۇشىن اسا ماڭىزدى ساياسي ناۋقان – قازاقستان رەسپۋبليكاسى پارلامەنتى ءماجىلىسى مەن ءماسليحاتتارى دەپۋتاتتارىنىڭ كەزەكتەن تىس سايلاۋى وتپەك. بۇل كۇنگى ساياسي پروتسەسس ەل ازاماتتارى ءۇشىن دەموكراتيانىڭ كورىنىسى عانا ەمەس، ءۇمىت پەن سەنىمگە، جاقسىلىق پەن جاسامپازدىققا جەتەلەيتىن كەزەڭ. بۇل كۇن، اسىرەسە، جاستارعا، جاۋاپكەرشىلىك ارتىپ، بەلسەندى بولۋعا، مەملەكەتتىك مۇددە جولىندا قىزمەت ەتۋگە ۇندەيتىنى انىق.
وسى رەتتە، سىر جاستارى «#مەنسايلاۋعابارامىن» حەشتەگىمەن الەۋمەتتىك جەلىلەردە جاستاردى ساياسي ناۋقانعا بەلسەندى بولۋعا شاقىرۋ اكتسياسىن وتكىزۋدە. جاستار اكتسياسىنا قالا جانە اۋدان جاستارى قاتار ءۇن قوسىپ، سايلاۋعا باراتىنىن ءارى مەملەكەتتىڭ جاڭا كەزەڭگە، جارقىن بولاشاققا باستار ءساتى ءۇشىن تىكەلەي مۇددەلەستىك تانىتاتىنىن ايتىپ، جازبا قالدىرۋدا.
وسىنداي جاستاردىڭ اراسىندا سىر وڭىرىنە بەلگىلى جاس اقىن ايدار سايلاۋوۆ تا بار. ايدار بارشا جاستى داۋىس بەرۋگە ءبىراۋىزدان قاتىسىپ، ەل ءۇشىن ماڭىزدى شەشىمدى بىرگە قابىلداۋعا شاقىردى.
- جاڭاشىلدىققا بەت العان ەلىمىزدە كەز كەلگەن ساياسي ناۋقانعا جاستار سالعىرت قاراماسا دەيمىن. ناۋرىز ايىن – بارشا جاقسىلىقتىڭ، ىنتىماقتىڭ، بەرەكە مەن بىرلىكتىڭ باستاۋى رەتىندە قابىلدايمىز. 19 ناۋرىزدا وتەتىن سايلاۋ دا وسى دۇنيەگە نەگىزدەلسە كەرەك. سوندىقتان بارشا زامانداستارىمدى، جاستاردى، دوستارىمدى سايلاۋعا شاقىرامىن، داۋىس بەرىڭىزدەر، ءوز پوزيتسياڭىزدى قورعاڭىزدار، - دەيدى جاس اقىن.
سىر جاستارى سايلاۋالدى بەلسەندىلىك تانىتىپ قانا قويماي، ماڭىزدى كۇندى مەيلىنشە جوعارى دەڭگەيدە وتكىزۋگە اتسالىسۋعا دايىن. وبلىستىق «جاستار رەسۋرستىق ورتالىعى» جانىنان قۇرىلعان «اقيقات» دەبات كلۋبىنىڭ جەتەكشىسى، بەلسەندى جاس ايجان ورىنباسار دا ستۋدەنت-جاستاردى ءوز تاڭداۋىن جاساۋعا شاقىرۋدا.
- ءسىز بۇل كۇندە، بۇل ساتتە داۋىس بەرۋمەن شەكتەلمەيسىز، ءسىز بولاشاعىڭىزعا باتىل قادام جاسايسىز. قانداي مەملەكەتتە ءومىر سۇرگىڭىز كەلەدى، قالاي ءومىر سۇرگىڭىز كەلەدى، بولاشاقتى، ۇلتتىڭ تاعدىرىن قالاي ەلەتەتەسىز، سوعان قاراي ارەكەت قىلىڭىز. داۋىس بەرۋ عانا ەمەس، سىزدەن ۇلتتىڭ ارى قارايعى دامۋى مەن داڭعىل جولىن ايعاقتايتىن ماڭىزدى شەشىم قابىلداۋدى كۇتەدى. ەلىمىزدىڭ ءاربىر جاس بۋىنى وزىنە ارتىلعان وسى ءبىر جاۋاپكەرشىلىكتى ادال ارقالاسا، ءبارى جاقسى بولماق، - دەيدى جاس پىكىرسايىسشى.
وسىلايشا قوعامنىڭ قوزعاۋشى كۇشى جاس بۋىن قاتارلاستارىن بەرىلگەن مۇمكىندىكتى ۇتىمدى پايدالانىپ، ەل تاعدىرىنا ءۇن قوسۋعا شاقىرادى.
"ادىرنا" ۇلتتىق پورتالى
