بۇگىن ايماق باسشىسى نۇرلىبەك نالىباەۆ ەل اعالارىمەن بىرگە سول جاعالاۋدا بوي كوتەرگەن 40 پاتەرلى جاڭا كوپقاباتتى تۇرعىن ءۇيدى باسپاناسى اپاتتى دەپ تانىلعان تۇرعىندارعا سالتاناتتى تۇردە تارتۋ ەتىپ، قونىس تويىمەن قۇتتىقتادى.
- كەيىنگى جىلدارى سىر وڭىرىندە تۇرعىن ءۇي قۇرىلىسى قارقىندى دامىپ، قالا اۋماعى الدەقايدا ۇلعايدى.
مەملەكەت باسشىسى قاسىم-جومارت كەمەلۇلىنىڭ سىر ەلىنە دەگەن قولداۋىمەن ايماقتا بەرەكەلى ىستەر اتقارىلۋدا. وبلىس ورتالىعىندا قالانى كورىكتەندىرىپ، اجارىن ايشىقتاي تۇسەتىن بىرقاتار ءزاۋلىم عيماراتتىڭ ىرگەتاسى قالانىپ، الەۋمەتتىك نىسانداردى سالۋ ءساتتى جۇزەگە اسۋدا.
وسىنىڭ الدىندا جەرلەسىمىز بولات وتەمۇراتوۆتىڭ قولداۋىمەن سالىناتىن «قورقىت اتا» اۋەجايىنىڭ جاڭا جولاۋشىلار تەرمينالىنىڭ ىرگەتاسىن قالاۋ راسىمىنە قاتىستىق. تەرمينالدىڭ قۇرىلىسى كەلەر جىلى اياقتالىپ، ەل يگىلىگىنە تابىستالاتىن بولادى، – دەدى ايماق باسشىسى ن.نالىباەۆ.
بيىل وبلىس ورتالىعىن كوركەيتۋگە قوماقتى قاراجات بولىنۋدە. اتاپ ايتقاندا، بەيبارىس سۇلتان كوشەسىنىڭ نازارباەۆ داڭعىلىنان «قىزىلوردا-قۇمكول» تراسساسىنا دەيىنگى بولىگى قايتا جاڭعىرتىلىپ، كەڭەيتىلىپ، اباتتاندىرىلماق. «قازاقستان تەمىر جولى» باسشىلىعى تەمىر جول ۆوكزالى عيماراتى مەن پەررونىن قايتا جاڭعىرتۋعا قاراجات بولمەك. سونداي-اق، جىل اياعىنا دەيىن سىرداريانىڭ سول جاعالاۋىنا ينۆەستور قارجىسىنا قۇنى 800 ملن. تەڭگەنى قۇرايتىن جاڭا اۆتوۆوكزال سالۋ جوسپارلانۋدا.
«قازگەرمۇناي» كومپانياسى باسشىلىعىمەن كەلىسىم ناتيجەسىندە قالادا زاماناۋي ۇلگىدەگى وقۋشىلار سارايىنىڭ جوباسى باستالادى. قۇنى 1,6 ملرد. تەڭگەنى قۇرايتىن نەكە سارايى عيماراتى شىلدە ايىندا پايدالانۋعا بەرىلمەك. ال قۇنى 3,7 ملرد. تەڭگە بولاتىن 1000 ورىندىق ونەر ورتالىعى جەلتوقسان ايىندا، سول جاعالاۋداعى قۇنى 2,7 ملرد. تەڭگەنى قۇرايتىن قان ورتالىعى 2024 جىلى ەل يگىلىگىنە تابىستالادى.
ءىس-شارادا «قۇرمەت» وردەنىنىڭ يەگەرى، قىزىلوردا قالاسى جانە ارال اۋدانىنىڭ قۇرمەتتى ازاماتى يمامادين وڭعارباەۆ تۇرعىنداردى قۋانىشىمەن قۇتتىقتادى جانە سىرداريا اۋدانىنىڭ قۇرمەتتى ازاماتى ابدىعاپپار امiرعاليەۆ جيىلعان قاۋىمعا اق باتاسىن بەردى.
قونىس توي يەلەرىنىڭ اتىنان زەينەتكەر ءاليما ابىشەۆا العىس ءبىلدىرىپ، جەرلەستەرىن ناۋرىز مەرەكەسىمەن قۇتتىقتادى.
انىقتاما ءۇشىن: ايماقتا وتكەن جىلى 604,0 مىڭ شارشى مەتر تۇرعىن ءۇي، ونىڭ ىشىندە، بيۋدجەت قارجىسى ەسەبىنەن قىزىلوردا قالاسىندا سپمك-70 تۇرعىن اۋدانىندا ەكى 40-پاتەرلى جانە ەكى 50-پاتەرلى كرەديتتىك تۇرعىن ءۇي پايدالانۋعا بەرىلدى.
بيىل قارجىلاندىرۋدىڭ بارلىق كوزى ەسەبىنەن 692 مىڭ شارشى مەتر تۇرعىن ءۇي پايدالانۋعا بەرىلمەك. تۇرعىن ءۇي قۇرىلىسىنا وبلىستىق بيۋدجەتتەن 2,7 ملرد.تەڭگە قارجى ءبولىندى. بۇل قارجىعا 982 پاتەرلى 23 تۇرعىن ءۇيدىڭ قۇرىلىسى جۇرۋدە. ونىڭ ىشىندە ساتىپ الۋ قۇقىعىنسىز جالعا بەرىلەتىن 462 پاتەرلى 12 تۇرعىن ءۇي بار.
نەسيەلىك تۇرعىن ءۇي قۇرىلىسى بويىنشا بيىل قىزىلوردا قالاسىندا 520 پاتەرلى 11 تۇرعىن ءۇيدىڭ قۇرىلىسىن جۇرگىزىپ، پايدالانۋعا بەرۋ جوسپارلانۋدا.
بۇدان بولەك، سىرداريا وزەنىنىڭ سول جاعالاۋىندا 84 پاتەرلى 7 قاباتتى 6 تۇرعىن ءۇيدىڭ قۇرىلىسى باستالادى دەپ كۇتىلۋدە.
