Búgin aımaq basshysy Nurlybek Nálibaev el aǵalarymen birge sol jaǵalaýda boı kótergen 40 páterli jańa kópqabatty turǵyn úıdi baspanasy apatty dep tanylǵan turǵyndarǵa saltanatty túrde tartý etip, qonys toıymen quttyqtady.
- Keıingi jyldary Syr óńirinde turǵyn úı qurylysy qarqyndy damyp, qala aýmaǵy áldeqaıda ulǵaıdy.
Memleket basshysy Qasym-Jomart Kemelulynyń Syr eline degen qoldaýymen aımaqta berekeli ister atqarylýda. Oblys ortalyǵynda qalany kóriktendirip, ajaryn aıshyqtaı túsetin birqatar záýlim ǵımarattyń irgetasy qalanyp, áleýmettik nysandardy salý sátti júzege asýda.
Osynyń aldynda jerlesimiz Bolat Ótemuratovtyń qoldaýymen salynatyn «Qorqyt Ata» áýejaıynyń jańa jolaýshylar termınalynyń irgetasyn qalaý rásimine qatystyq. Termınaldyń qurylysy keler jyly aıaqtalyp, el ıgiligine tabystalatyn bolady, – dedi aımaq basshysy N.Nálibaev.
Bıyl oblys ortalyǵyn kórkeıtýge qomaqty qarajat bólinýde. Atap aıtqanda, Beıbarys sultan kóshesiniń Nazarbaev dańǵylynan «Qyzylorda-Qumkól» trassasyna deıingi bóligi qaıta jańǵyrtylyp, keńeıtilip, abattandyrylmaq. «Qazaqstan temir joly» basshylyǵy temir jol vokzaly ǵımaraty men perronyn qaıta jańǵyrtýǵa qarajat bólmek. Sondaı-aq, jyl aıaǵyna deıin Syrdarııanyń sol jaǵalaýyna ınvestor qarjysyna quny 800 mln. teńgeni quraıtyn jańa avtovokzal salý josparlanýda.
«QazGerMunaı» kompanııasy basshylyǵymen kelisim nátıjesinde qalada zamanaýı úlgidegi Oqýshylar saraıynyń jobasy bastalady. Quny 1,6 mlrd. teńgeni quraıtyn Neke saraıy ǵımaraty shilde aıynda paıdalanýǵa berilmek. Al quny 3,7 mlrd. teńge bolatyn 1000 oryndyq Óner ortalyǵy jeltoqsan aıynda, sol jaǵalaýdaǵy quny 2,7 mlrd. teńgeni quraıtyn Qan ortalyǵy 2024 jyly el ıgiligine tabystalady.
Is-sharada «Qurmet» ordeniniń ıegeri, Qyzylorda qalasy jáne Aral aýdanynyń Qurmetti azamaty Imamadın Ońǵarbaev turǵyndardy qýanyshymen quttyqtady jáne Syrdarııa aýdanynyń Qurmetti azamaty Ábdiǵappar Ámirǵalıev jıylǵan qaýymǵa aq batasyn berdi.
Qonys toı ıeleriniń atynan zeınetker Álıma Ábisheva alǵys bildirip, jerlesterin Naýryz merekesimen quttyqtady.
Anyqtama úshin: aımaqta ótken jyly 604,0 myń sharshy metr turǵyn úı, onyń ishinde, bıýdjet qarjysy esebinen Qyzylorda qalasynda SPMK-70 turǵyn aýdanynda eki 40-páterli jáne eki 50-páterli kredıttik turǵyn úı paıdalanýǵa berildi.
Bıyl qarjylandyrýdyń barlyq kózi esebinen 692 myń sharshy metr turǵyn úı paıdalanýǵa berilmek. Turǵyn úı qurylysyna oblystyq bıýdjetten 2,7 mlrd.teńge qarjy bólindi. Bul qarjyǵa 982 páterli 23 turǵyn úıdiń qurylysy júrýde. Onyń ishinde satyp alý quqyǵynsyz jalǵa beriletin 462 páterli 12 turǵyn úı bar.
Nesıelik turǵyn úı qurylysy boıynsha bıyl Qyzylorda qalasynda 520 páterli 11 turǵyn úıdiń qurylysyn júrgizip, paıdalanýǵa berý josparlanýda.
Budan bólek, Syrdarııa ózeniniń sol jaǵalaýynda 84 páterli 7 qabatty 6 turǵyn úıdiń qurylysy bastalady dep kútilýde.
